Sorkar hnathawk inzawmkhawm pawl Federation of Mizoram Government Employees & Workers (FMGE&W) te’n an dilna tihhlawhtlin a nih loh chuan MUHCS atana an hlawh cut thin chu titawp tura hmalak an rel.
September ni 11 khan FMGE&W executive committee an thu a, sorkar hnathawk leh kan family member-te dam lo, non empanel hospital-a luh ngaite hi sorkarin reimursement min phalsak turin dil ni se, October 2026 thlenga kan dilna hi min phalsak loh chuan MUHCS tana kan hlawh cut thin hi titawp tura hmalak ni se, tiin an rel a ni.
An sawi danin, Mizoram Universal Health Care Scheme (MUHCS) tan dawn khan zawm ve turin sorkarin a ti a, mahse health care facility nei sa an nih avanga tul an ti chiah lo chungi sorkar thu an zawm a, mahse an beisei angin thil a kal ta lo a ni.
‘MUHCS-ah thla tin in hlawh atanga cut a ni ang a, 100% in bill thei ang a, cashless a ni bawk ang, tiin sorkar lamin min tiam a, min telh lo turin kan ngen a, mahse min telh lui ta tho a,’ tiin MUHCS-a an tel dan an sawi.
An sawi danin, High Court-a khin an tum a, mahse sorkarin court-a kal lo tura ngenin review committee din a tiam a, tichuan MUHCS-a an dinhmun tur pawh siamthat niin, emergency thilah empanel hospital ni lova an luh pawhin an bill thei ang tih a ni ta a ni.
Mahse MUHCS 2.0 hnuaiah hian thil a danglam ta tih an sawi a, “Empanel hospital ni lova kan luhin kan bill thei ta lo tluk a ni,” an ti.
“Nunna atana hlauhawm khawp thil vangin damdawi in hnai hnaia luh a ngai thei a, bill theihna tia empanel hospital kan pan hram hram pawhin khum kan chang lo thei bawk a. Chutiangah chuan empanel hospital ni lovah min refer ta a, mahse min refer ngei pawhin kan bill thei ta lo a,” tiin an dinhmun an sawi.
“Refer hi bill theih ni se kan duh a, chu chu kan ngen a, chu chu min phalsak turin sorkar kan beisei a ni. Chu pawh a theih loh a nih chuan kan phalna ni lova kan hlawh an cut hi tihtawp ni se kan duh a,” an ti.
Sorkar hnathawkte’n MUHCS-a hlawh cut titawp turin hma la mai thei
