Mizoram sorkarin Mizoramah CBI te zalen taka thawk thei turin general consent a pe em tih thu-ah inhnialna a awm a, nikum hmasa lam atangin politics-ah inhnialna lian pakhat a tling. General consent hrilhfiah dan a inang lo te pawh a ni thei.
CBI hian Mizoram sorkar hnathawkte ni lo, Mizorama sorkar laipui hnuaia thawkte chhui phalna an nei a, chief minister chuan cu chu general consent tiin a sawi.
Lawngtlai West bialtu C Ngunlianchunga zawhna, ziaka chhan chi chhangin chief minister Lalduhoma, vigilance department changtuin CBI te hi general consent pek an ni tiin March ni 6 khan House a hrilh a ni.
‘Central Bureau of Investigation (CBI) hnenah Mizoram sorkarin general consent a pe em?’ tih zawhna chu “Mizoram sorkarin Central Bureau of Investigation (CBI) hnenah Mizoram chhunga central government employees leh central public undertaking-te chhui phalna general consent a pe,” tiin a chhang.
December ni 28, 2023-ah khan Mizoram sorkarin notification a chhuah a, Mizorama an duh an chhui phalsakna ‘consent’ pek an nih thu hi a chhuah a ni. Chief minister-in instagram-ah a post nghal a, notification thlalak a post bakah “CBI consent pawh approve a ni ta e,” tih a ziak.
Mahse hei hi a hnu-ah sut leh a ni; July ni 1, 2024-ah gazette-ah CBI phalna pek tawh sut leh thu hi chhuah a ni a, notification-ah hian Mizoram sorkarin CBI hi Mizoram puma thil chhui phalna pek a lo nih tawh thu tarlan niin, mahse Mizoram sorkar hnuaia thawkte chhui chungchang erawh hei hian a huam lo ang tia tihdanglam a nih thu tarlan a ni. Mizoram sorkar hnuaia mite chu Mizoram sorkar phalna lova chhui theih an ni lo ang tih a ni.
March ni 6-a chief minister chhanna a lan danin, June ni 27, 2024-ah Mizoram sorkarin notification a chhuah a, chutah chuan sorkar laipui hnuaia thawk, Mizorama awmte bikah general consent hi a pe a ni. Chutih laiin Mizoram sorkar hnuaia thawkte huam ta se, chutiang chu general consent ti an awm ve thung niin a lang.
Sorkar laipui hnuaia mite chauh huamin general consent
