Sorkar sem khuh damdawi ei hnuah naupang pahnih thi

Sorkar sem khuh damdawi ei hnuah naupang pahnih thi
Tun hnaiah Rajasthan sorkarin an state chhunga khuh damdawi a sem ei naupang pahnih an thi a, damdawi hi sorkar health centre-ten an sem chhuah a ni.
Hetih lai hian doctor pakhat, an damdawi sem chu a him em tih enfiahtu chu a ei hnuah nikhawhrelovin a awm zui bawk a. Chhui chianna tur thupek chhuah nghal niin damdawi batch 22 chu sem zui lova tihtawp rih a ni bawk.
Drug Controller Ajay Phatak-a chuan an department-a drug inspector chuan Sikar, Jhunjhunu leh Bharatpur atangin damdawi sample hi a la a, a endikna report hi ni thum chhung vela an hriat theih tur thu a sawi.
Department hian khuh damdawi an ei hnuah naupang eng emaw zat an damlo zui tih an dawng tih Phatak-a chuan a sawi niin PTI-in a tar lang a. Damdawi tui chi hi naupang kum nga hnuai lam hnena pek loh tura tih a ni bawk.
Sikar district-a kum nga mi leh Bharatpur-a kum hnih mi chu damdawi an ei hnuah hian an thi a. Sikar-a mi zawk hi community health centre-in ei tura an tih anga ei nia sawi a ni.
Naupang hi Pathianni hmasa khan Chirana Community Health Centre-ah damdawi hi pek a ni a, hemi zan atang hian a dinhmun a hniam zui nghal a. Thawhtanni tukah damdawi ina hruai a nih mek laiin a thi tih Dadiya Police Station Assistant Sub-Inspector Rohitashwa Kumar chuan a sawi niin PTI-in a tar lang.
Kumar-a chuan hemi chungchangah hian naupang nu leh pate chuan complaint thehlut emaw, ruang post-mortem, emaw an duh lo va; mahse, a pu (a nu pa) chuan ama thuin complaint a thehlut a ni.
Bharatpur-ah pawh hetiang deuh chiah hi a thleng a, naupang kum hnih mi chu hetiang damdawi tho, tual chhung health centre-in an chawh a ei hnu lawkah a thi ve bawk a ni.
“Ka tute pathumin hetiang damdawi tui hi an ei a. Pahnih chu nasa taka luak chungin an harh thei a, Samrat erawhin engmah a hre zui thei ta lo a ni,” tiin pitar, Nehni Jatav-i chuan a sawi a. A hnuah an chhungkua chuan damdawi an ei avanga hetiang hi tuar an ni tih an hre chauh tih a sawi.
Doctor pakhat, damdawi chu a him leh him lo finfiah tuma ei pawh nikhawhrelovin an awm phah bawk a. Bayana Community Health Centre in-charge Dr Tarachand Yogi-a hian a nu leh pate hrilh lawk chungin damdawi hi a ei a, a hnu darkar riatah a car chhungah nikhawhrelovin an hmu tih PTI chuan a tar lang.
Hetiang deuh chiah hian thla liam ta chiahah khan Madhya Pradesh-a Chhindwara district-ah naupang paruk chu khuh damdawi an ei hnu lawkah an kal hnathawk thei lova awmin an thi tawh bawk.
Khuh damdawi ei vang ni ngeia hriata naupang an thih hnuah hian Chhindwara District Collector Sheelendra Singh-a chuan damdawi pahnih chu hman a khap nghal a, enfiahnaah chuan damdawi bawlhlo chi khat chu a nih dan tur aia tam a tel nia hmuh a ni.