Sorkarin hmunphiah lei ta

Hmunphiah keh hun a ni tawh lo a, a thartute’n an neih mumal tawh loh hnuah sorkarin a lei ve tan.
Hmunphiah hi a ro kg-ah Rs 100 man tur tiin sorkarin a bituk a, kg-ah Rs 80-in sorkar hian a lei.
“A awm ang ang kan hralh chuan kan lawm a ni tawh mai. Suma chantir ve hrim hrim hi kan mamawh a. Tam phei zawng kan nei tawh lo ang,” Vairengte-a hmunphiah hmun neitu pakhat chuan a ti.
Sorkar hian Vairengte leh a chhehvel khuaa hmunphiah a lei tan a, Vairengte-ah phurkhawm a ni. Vairengte bikah phei chuan hmunphiah hi an ngah tawh lo a, a chhehvel khaw hrang hrang atangin an phurkhawm a ni. Hmunphiah neitute chuan kum dangah chuan mahni khuaah an hralh thin a, kuminah erawh Vairengte khaw mi ni lo tan chuan Vairengte phurh thlen a ngai tih an sawi; mahse man tlawm zawk pawha a awm ang ang hralh hi an duh tih an sawi.
An sawi danin, hmunphiah hi January thla laihawl atanga February thla laihawl thlengin an kekin an hralh thin a, chumi hnuah chuan a par tawh thin. Kuminah nikum ang bawkin a man a tlawm avangin an buai a, a keh hun laia an keh sa la hralh loh an neih bakah kek thar pawh ni se a tha thei tawh dawn lo tihte an sawi.
Vairengte leh a chhehvel khuate hian hmunphiah hi a hringin an hralh tlangpui a, a hring kg 3 leh a ro kg 1 a intlukah an ngai. A hring hi kg-ah Rs 40 te’n an tan a, Rs 50-ah te, Rs 60-ahte a kai thin. A ro kg-ah Rs 100 tia bituk a nih avanga a hring man pawh tlahniam nghalah an ngai a, kuminah Rs 15 velin an hralh. Rs 13 a nih lai te pawh a awm. A ro pawh kum dangah chuan kg-ah Rs 150 te, Rs 160 te’n an hralh thin.
Hmunphiah tamna Tlabung leh a chhehvelah chuan sorkarin hmunphiah hi a la lei lo a, hralh bang la nei an awm nawk tih thu dawn a ni.
Budget Session neih mekah chief minister-in hmunphiah an lei tur thu hi a sawi thin a, February ni 11 pawh khan “An hralh bang hi chu kan lei vek dawn,” tiin, “Rs 80-in kan lei vek dawn tho tho,” a ti.