South Africa tui lianin sikul naupang phur minibus la

South Africa tui lianin sikul naupang phur minibus la
South Africa-a tui lian nasa takin Thawhlehni khan sikul naupang phurtu bus tê chi (minibus) a la niin Eastern Cape province sorkar thupuangtuin a sawi.
Khuselwa Rantjie-i chuan bus-ah hian naupang engzat nge chuang tih an la hre thei lo va; mahse, naupang pathum erawh dama an hmuh tawh thu a sawi a. Zan a nih tawh avangin chhanchhuah hna thawh chawlhsan niin Nilaini khan an chhunzawm leh tih a sawi.
Eastern Cape province thovah hian OR Tambo district-ah tui lianin a lak mi pasarihte ruang an hmu bawk tih a sawi.
South Africa-ah hian vur leh ruah tam tak a sur a, thli na tak a thaw bawk a, hei vang hian lirtheia chetsualna thlengah mi panga an lo thi tawh bawk a. Chhungkaw 5,00,000 dawn electricity nei lovin an awm phah mek bawk.
Mi hang enhranna dotu langsar tak, Nelson Mandela pianna, Eastern Cape hi vur tla nasa lutuk tuar na ber niin KwaZulu-Natal province pawhin an tuar na ve hle bawk.
Khaw awm dan uchuak lutuk avang hian province pahnihah hian chhiatna dang a thlen zel loh nan kawngpui lian thenkhat chu khar hial a ni.
Eastern Cape Premier Oscar Mabuyane-a chuan, “Hei hi khuarel tha chakzia leh chhiatna a thlen nasat theihzia lantirna a ni a. Tui a len mai theihnaa awm mi tinte inring turin kan ngen a ni,” a ti.
Tuipui kam khawpui, East London bula minibus taxi letah mi panga an thi a, a khalhtu hian thing tlu hel a tumna lamah a thunun zo lo palh niin Eastern Cape transport department thupuangtu, Unathi Binqose chuan a sawi.
He thil thlengah hian mi pahnihin hliam an tuar bawk tih a sawi.
Sorkar hnuaia power utility Eskom chuan Eastern Cape-a khaw 14-a chhungkaw 3,00,000 chuangin electricity an nei lo niin a sawi.
KwaZulu-Natal-a hmun 24-a chhungkaw 1,96,000-in power hi an nei lo bawk niin Eskom thupuangtu, Daphne Mokwena chuan a sawi bawk.
KwaZulu-Natal Transport Minister Siboniso Duma chuan vur tla nasa lutuk avang hian kawngpuiah lorry an tangkhang nasa hle tih a sawi.
Vur tlak nasatna laiah chuan grader machine chhawp niin heng khawl hian cm 30-a chhah a tlin hunah zel kawng hi an thian fai thin a ni.
Meteorologist Lehlohonolo Thobela chuan tuipuiah thli na tak leh tui fawn nasa tak a awm thei tih sawiin lawngte tan inkhalh a harsa thei dawn niin a sawi.
Eastern Cape leh KwaZulu-Natal hi tuipui kama awm ve ve an ni.
South Africa hian an thlasik hun, June atanga August inkar hian vur an dawng tam thei hle a, khaw vawh lam pawh 0°C hnuai lam a ni thin.
Tui a lian deuh ziah bawk a, scientist-te chuan sik leh sa inthlak nasa avangin ruah a sur tam zual niin an sawi.
April 30 leh May 2 inkarah sabereka khuangkai leh an kuang atanga lui tui luang liamin chenna in 4,500 tichhiain mi 18-in hliam an tawrh phah bawk.