Pyongyang-in balloon za tel hmanga South Korea-a bawlhhlawh a thehdarh zui zel avangin Seoul chuan ram pahnih boruak tang tihziaawm nana kum 2018 a military deal siam chu a vaiin a hnawl.
Nikum khan Seoul chuan North-in spy satellite a kahchhuah avangin inremna thenkhatte a lo hnawl tawh a, tunah chuan Korea ram pahnih tena inrintawnna thutlung an siam hma chuan ‘September 19 Military Agreement’ chu hnawl a ni tiin a sawi.
Tun hnaiah Pyongyang chuan balloon sang tel a chhunga bawlhhlawh sikret zuk bung tih te leh mihring ek awmna te chu South lamah a chhuah a, hei hi South in anti-regime propaganda a kalpui chhanletna tiin a sawi.
South Korea chuan North Korea chet dan chu ‘low-class’ a tihsak a, ballistic missile kahchhuah ang lo takin North Korea trash campaign kalpui chuan UN hrekna a kalh tlat lo thung.
North chuan balloon hmanga South Korea a beihna chu a tha takzet tia sawiin a tul a nih chuan a aia nasa in an kalpui zui tur thu a sawi bawk.
Ram pahnih te hi technically a indo an la ni chungin kum 2018 khan ramria inepna sang tak karah military deal siamin boruak tang tur ven a ni a.
Mahse nikum khan Pyongyang-in spy satellite hlawhtling taka a kahchhuah hnuah Seoul chuan inremna an neih te chu a then a zar a hnawl a, North chuan inremna chu a pumin a hnawl tawh sa tiin a lo sawi tawh a ni.
Seoul in thutlukna a siam takah chuan Military Demarcation Line hnaihah military training te a nei thei tawh dawn a, North Korean vauna te na zawkin a chhanglet thei tawh dawn bawk a ni.
Korea ram pahnih te inlaichinnain a chhiat lai ber pawl a thleng mek a, diplomacy lama inbiakna a hlawhchham a, Kim Jong Un chuan a weapon testing development a tichak bawk a, South Korea chuan Washington a belbul zual tial tial bawk.
Seoul-in kum 2018 a inremna a hnawl thak hi North Korea balloon vawm luh chu a duhlohzia lantirna a ni tiin Hong Min, senior analyst, Korea Institute for National Unification chuan a sawi a.
“Balloon te chu dan theih loh pawh ni se South Korea chuan Pyongyang runluih dan a hre tho” tiin a sawi bawk.
South Korea Joint Chief of Staff chuan balloons-ah chuan thil hlauhawm a awm lem lo tia sawiin northern province lamah tla berin a bik takin capital Seoul leh a chehhvel Gyonggi velah a tla ber tiin a sawi.
South Korean officials te chuan North Korea balloon vawm luh runluih nan loudspeaker propaganda campaign an kalpui leh mai theih thu an sawi bawk.
Tun hma chuan South Korea chuan anti-Kim propaganda chu North lamah a rik tir vak thin a, chu chu Pyongyang chuan a haw em em a ni.
South Korea leh North Korea te hian hun rei tak chhung chu inthianthatna siam tumin hmalakna an nei a, ram pahnih hruaitute pawh inhmuin a bik takin US president Donald Trump a nih hun lai khan ram pahnih inlaichinnaah hmasawnna a awm a, mahse, tun hnaiah a chhe zui ta zel a ni.
North Korea chuan UN hrekna pawisa lovin nikum atang khan ralthuam enchinna liantham tak takin a kalpui leh tan a, chuvang chuan khawvel ram thiltithei ten nasa zawkin an hrekphah mek a ni.
North Korea hian China leh Russia a hnaih hle a, Ukraine indonaah pawh Russia hman turin ralthuam a pe a, Russia in technology lamah a pui ve thung bawk.
South-in North nena inremna hnawl
