South Korea in ‘Deepfake’ buaipui

South Korea president chuan an rama digital sex crime epidemic chu ‘nuaibo’ a nih theih nan thuneitute chu nasa zawka chet la turin a ti a, hei hi tun hnaia thalai zawk hmeichhia te laka deepfake pornography nasa taka kalpui a nih vang a ni.
Thuneitute, journalists leh social media users te chuan tun hnaiah chat group tam tak kum tling lo naupang hmeichhiate thlalak hmanga ‘deepfake’ tihna mipat hmeichhiatna thil uchuak zet zet inpek tawnna an hrechhuak a.
Deepfakes te hi artificial intelligence hmangin midang taksa hmang tangkaia an hmel dang daih vuahna a ni a.
South Korea media regulator te chuan deepfake image in-share tawnna hrang hrang hmuhchhuah a nih hnuah emergency meeting an nei zui a ni.
South Korean President Yoon Suk Yeol chuan thuneitute chu ‘digital sex crime chu nuaibo a nih theih nan investigation kimchang taka nei’ turin a hrilh a.
“Tun hnaiah deepfake videos te hmangin mi tam tak te thlurbingin social media-ah nasa taka thehdarhin a awm a ni,” tiin President Yoon chuan cabinet meeting neihnaah a sawi a. “Henga a victim te hi kum tling lote ni berin a titute pawh tleirawl an ni tlangpui,” tiin a sawi bawk.
Kar kalta khan chung deepfake pornographic inshare tawnna te chu school leh university chat group hrang hrangah hmuhchhuah niin a tlangpuiin social media app Telegram chu hman tangkai a ni tlangpui bawk.
Tleirawl chung apps hmang tute chuan thlalak an classmate leh zirtirtute chu upload-in chu chu use dangte chuan deepfake image explicit tak tak siam nan an lo hmang zui ta thin a ni.
Kar kalta Inrinni khan Russia-a piang Telegram neitu Pavel Durov chu France ah child pornogra[hjy, drug trafficking leh messaging app fraud kaihhnawih vanga man a ni.
South Korea hian digital sex crime lamah history duhawm lo tak a nei nasa a. Kum 2019 khan mipa thenkhatte chuan Telegram chatroom hmang tangkaiin tleirawl te te te chu sexual acts ti tura hruaikawi niin chu scandal chu nth-room tia hriat lar a ni a He thila ring-leader Cho Ju-bin chu kum 42 lung in tang tura hremin a awm tawh a ni.
Online deepfake sex crime chu South Korea-ah tun hnaiah a nasa hle a. Kumin thla sarih chhungin South Korean police te chuan case 297 an ziak lut tawh hial a, nikum pum aiin a sang tawh zawk.
Korean Teachers Union te chuan tun hnaia deepfake image thehdarh kaihhnawihah school 200 vel zet a nghawng tiin an sawi a. Tun hnaiah deepfake zirtirtute tlurbing chu a nasa zual tiin sawi a ni bawk.
Main opposition Democratic Party a interim leader hlui leh women’s right activists Park Ji-hyun chuan SOuth Korea in deepfake porn problem a neihah ‘national emergency’ puan hial a ngai tihialin a sawi a.
“Deepfake sexual abuse material te hi minute khat leka siam teih a ni a, tu te pawh verification process tel hauh lovin chatroom-ah lut thei a ni” tiin Park chuan a sawi a.
President Yoon chuan ‘media culture hrisel’ a awm theih nan thalai mipate chuan an zir a ngai tiin a sawi a. “A chang chuan prank anga kalpui a nih piah lamah criminal act a phena technology biru si leh a titute hriat miah si lohva thil pawi tak khawih theihna a awm a ni,” tiin a sawi.