South Korea-in ei atana Ui vulh leh talh a khap dawn

South Korea chuan ei tura ui talh a khap dawn ta a, South Korea MP te chuan dan thar an siam ta a ni.
He dan thar hi kum 2027 a\anga hman \an tur niin kum za tel uisa an ei tawh \hinna chu tihtawp tum a ni dawn ta a ni.
South Korea-ah hian ui sa stew ‘boshintang’ chu an uar hle a, a bik takin kum upa lam tui tih a ni a. Mahse, uisa hi \halai lamah chuan a hlutna a tlahniam tial tial tia sawi a ni a.
Mahse dan thar hnuaiah hian ui sa ei hrim hrim chu danin a khap dawn lo thung.
Nikuma Gallup poll lakah thla 12 chhungin 8% chauhin ui sa an ei thu an sawi a, chu chu kum 2015 a poll laka 27% nen chuan intlem hleih tawh tak a ni a. Poll laka hmun ngaa \hena hmun khat chauhin uisa an ei thu an sawi.
Lee Chae-yeon, kum 22-a upa zirlai chuan ui sa zawrh leh hralh khap chu tihmakmawh a ni tawh a ti a. “Mi tam takin pets-ah an nei tawh a. Ui te hi chhungkua zinga mi ang mai niin chhungkaw member sa ei a fuh lem lo,” tiin a sawi.
Dan thar hnuaiah ui sa zawrhna te tih tawp a ni dawn a, ui talh te chu kum thum thleng lung in tantir theih an ni dawn a. Talh atana ui vulhtute chu kum hnih lung in tantir theih an ni dawn bawk.
Hei vang hian ui talh tur vulha eizawngte leh restaurant neitute chuan dan thar kalpui hmain eizawnna thar an ngaihtuah a ngai dawn a ni.
Sorkar statistics ang chuan South Korea-ah ui sa restaurant 1,600 vel a awm a, dog farm 1,150 vel a awm bawk a. Heng sumdawnna hmunte hian an sumdawnna khar dan tur an ruahmannate local authority te hnenah an thlen a ngi dawn a ni.
Sorkar chuan dog meat farmer, butcher leh restaurant owners te an sumdawnna kharsak tur te chu a \anpui tur thu a sawi bawk.
Kum 86-a upa Kim Seon-ho erawh a lawm lo hle a, “Middle Ages a\ang tawhin ui sa kan ei tawh a. Kan traditional food kan ei hi eng vangin nge min khapsak? Ui sa in khap a nih chuan bawngsa pawh khap rawh u,” tiin a sawi.
South Korea sorkar hmasa te pawhin kum 1980 chho khan ui sa khap an lo tum tawh a, mahse, an hlawhchham. Tuna President ni mek Yoon Suk Yeol leh First Lady Kim Keon Hee te hi animal lover anga ngaih niin ui paruk ngawt an nei mek bawk a, ui sa ei tihtawp duha hma la \hin an ni bawk.
Dog meat farmers te thung chuan khap a nih loh nan hma la ve thungin, ui sa ei an tlem telh telh avangin a pangngaiin ui sa ei chu a tawp zui mai ang an ti ve thung a. Ui sa kaihhnawiha inhnamhnawih tam tak te chuan an upat tak avangin sumdawnna dang buaipui an tan a harsa dawn an ti bawk.