South Korean President Lee Jae Myung-a chuan karleh hian India a tlawh dawn a, Prime Minister Narendra Modi-a nen inbiain sumdawnna, lawng siamna, semiconductor leh technology thar chhuakte ang chi thil pawimawh hrang hranga thawhhona tihpun an tum dawn a ni.
Lee-a hi kum riat hnua South Korean president zinga India-a zin hmasa ber a ni dawn a, Pathianni atanga Thawhlehni thlengin First Lady Kim Hea Kyung-i leh minister, sorkar thuneitu leh sumdawng hruaitute nen an ni dawn a. India a tlawh hmasak berna tur a ni ang.
Lee-a leh Modi-a hian kawng hrang hranga thawhhona tihchak dan tur an sawi dun dawn a, heng zingah chuan lawng sak, sumdawnna, investment, AI, semiconductor, technology pawimawh leh thar chhuak leh mipuite inpawhna te pawh a tel dawn niin external affairs ministry chuan Ningani khan a sawi a. An inkar thil bakah khawvel huap thil hrang hrang an sawi dun bawk ang.
Lee-a hian President Droupadi Murmu-i leh External Affairs Minister S. Jaishankar-a a kawm dawn bawk a ni.
South Korean National Security Adviser Wi Sung-rak-a chuan Seoul-a thuthar lakhawmtute a kawmnaah Lee-a zin hian South Korea-in Global South diplomacy a tichak dawn tih a sawi a. India a tlawh hian an ram leh India inkara inpawhna pawimawh bik an neih a tichak dawn a, eibara thawhhona tha thar a siam dawn niin a sawi.
Korea-India Comprehensive Economic Partnership Agreement tihchangtlun nan kum 2030-ah ram pahnihte insumdawn tawnna dollar tluklehdingawn 50 a tlin theihna tur kawng an dap dawn tih a sawi bawk.
Indian external affairs ministry chuan Lee-a’n India a tlawh hian ram pahnihte thawh dunna awm sa tihchak leh huang thar lo zauhna tur thil pawh sawia tih tum a nih thu a tar lang.
South Korean president-in India tlawh dawn
