Spain-ah rel hnathawkte lungawilo

Spain-a rel khalhtute chuan an hnathawhnaah himna tha tawk pek an nih loh avanga lungawi loh lantir nan Thawhtanni atang khan ram pumah nawrh an tan a, ni thum chhung a awh dawn.
Rel khalhtute hian he hmalakna hi January-a rel chesual pahnih a thlen hnua an tih niin pakhat zawk, an ram chhim lam Adamuz-a chetsualna thlengah phei chuan mi 46 an thi a. A hnu ni hnih lekah Barcelona bulah thleng lehin a khalhtu thiin mi eng emaw zatin hliam an tuar.
Heng chetsualna thleng hian zin veivakte tan hlauhthawnna lian tak siamin Spain-a fak hlawh tak, rel hmanga an inkalpawhnain rinhlelh a hlawh phah.
Rel khalhtu pawl, Semaf chuan thawktu tam zawk chhawr leh an hnathawhna hmuna sum tam zawk sen te, ‘rel inkalpawhna rawih mek zel’ enkawla siam tha tura hmalakte an phut.
Chhiatna pahnih a thlen hnuah chhui leh enzuinaah chuan dik lo leh rel kawng eng emaw zata chei that ngai tam tak hmuh chhuah a ni.
Spanish Prime Minister Pedro Sánchez-a chuan tun kar hian parliament rorel inkhawmah an rel inkalpawhnaa chhiatna thleng leh an thil tawn mek chu a sawi dawn.
January 18-a Adamuz-a chetsualna thleng hi rel tlan chak chiin a kawng zawh sualin a bul chiah kawnga amah tawk zawnga tlan rel a su a, kum 10 chuang chhunga an rama rel chetsualna rapthlak ber a tling.
Rel chtsualna chhuitu, CIAF-in an chhuinaah chuan rel ke-ah hian groove hmuin hjei hian rel hi a kawng a zawh sualtir a, a hmaa rel pathum tlanin an tlankawng chu a lo tikhi bawk si niin an sawi.
A hnu ni hnih leka Catalonia-a chetsualna thlengah khan rel khalh zir lai a thi a, mi dang 37 velin hliam an tuar a. He rel hi a kawng bula bang chimin a delh avanga a kawng zawh sual ta a ni.
Rel thuneitute chuan bang chim khan rel khalhtu chuanna pindan a delh a, a tlan tlang chuan a dawt chiaha mi a phurhte chuanna pindan hmasa ber a delh tel a. Hliam tuarte pawh he pindana chuangte deuh vek hi niin an sawi.
Semaf chuan a hma khan heng chetsualna thlengte hi ‘rala hnathawk hrang hrangte himna tha tawk a awm theih nana an phut mek tihhlawhtlin a tulzia lanna’ niin an sawi.
Rel ngaihsak lo nia sorkar sawiselna pawh a rik phah nasa hle a. Hetih lai hian Socialist kaihhruai sorkar chuan a nih bik loh thu sawiin tun hnai maiah pawh Madrid-Andalusia inkar kawng thuam chak nan € maktaduai 700 sen a ni tih a sawi.