Germany a khelh mek Euro 2024 chu July ni 9, Thawhleh zan khan semi-final khelh tan a ni a. Munich khawpuia Allianz Arena a inkhel hmuhnawm takah Spain chuan 2-1 in France an hneh a, final an lut. Inelna neih tirh atang khel tha tluang Spain an hmuhnawm deuh deuh zel a, champion turin rin an kai lehzual ta hle. Spain hian England leh Netherlands te inkhela chak zawk zawk an hmachhawn zui leh ang.
Bul tan tha France
Football a ram lian, player tha tak tak kawl khawmtu France hian Euro 2024-ah beisei an phak lova, an tlarhnung phui mah se goal thun an harsat. Semi-final an luh thleng hian goal thum chauh an thun a. Heng goal thum an thun pawh hi own-goal pahnih leh penlaty atanga Kylian Mbappe thun a ni. Goal thun an harsat vang hian hmuhnawm taka inlan a, goal thun thei tel bawk Spain lakah rin an kai zo lo hle. Spain hmachhawn tur an nih miau vangin semi-final hi an tawpna tura ngai an tam hle.
Spain lakah rinkai zo lo hle mah se France hian bul an tan tha a, goal thun hmasa zawkah an tang teh tlat. An tlarhmate an tlanchak leh thahruai an ngah an chhawr tangkai a, inkhel tir lamah an khingpuite an nawr tlang fua fuau. An khingpuite an nawr nghal pawp pawp vangin goal pawh an thun thuai. Inkhel tan atanga minute 9-na lekah Mbappe siam tha zet mai chu Kolo Muani chuan hnaite atangin tibuaitu nei map lovin a tauh goal a, hmahruaina goal a thun. Muani hian inelna neih mekah a hun tha neih hloh fo mah se Spain lakah goal a thun ta nge nge.
Spain an chhaihkawlh
France in goal an thun hmasa hi inkhel tihmuhnawm zualtu a ni a, Kolo Muani goal thun hmang hian an khingpuite an chhaihkawlh. Goal an thun hmasak vangin an phur hluai a, hlauhawm takin an khingpuite an nawr tlang zui leh. Goal chhuah belh em lovin Spain an him hram thung.
Goal chhuah hmasa zawkah an tan hnuin Spain an insiamtha a, an duh ang takin a khel thei ta thuai bawk. An duh ang taka an khelh theih hnuin France hi no hnih in ang char char an ni a, lu hai deuh chhap chungin Spain an hmachhawn a, an buai lo thei lo. Phur takin an khel chho a, Lamine Yamal goal ropuiin a tiphur lehzual sauh bawk. Rawlthar duhawm Yamal hian inringtawk taka a khalh rem hnuin minute 21-naah goal ropui a thun a, an si phurh a sut. France laka goal a thun hmang hian Euro-a goal thun thei naupang ber record a siam nghal a, Euro-ah record a siam belh chhunzawm zel.
Yamal goal hian Spain a fuih phur tak zet a, nuamti takin an khingpuite an hmachhawn chhunzawm nghal. France player te hual vel kar chep tak takah pawh rang leh dik takin ball an inpekual zung zung a, France an chhaihbuai tak zet. France an buai zual lai hian box chhungah Dani Olmo chuan inringtawkna sang tak leh fing leh tha tha chungchuangin ball a la lut a, France player intlan thelh karah fuh zetin a pet goal a, minute 25-naah hma an hruai letna goal a thun. Minute 25 chhung leka goal hnih a luh vangin goal tam zawk lut zui tura ngaih a ni a. Inkhel hmuhnawm takah goal dang a luh belh thei tawh lo thung. Hun tawp thlengin Spain an hmuhnawm tluan a, goal khatna an thun hma minute 21 thleng kha France nen an inbuktawk viau a. Minute 21 hnu lam zawn chu Spain chan, Spain lansarhna a ni tluan ta thung. An khingpuite nawr let thutin, hlauhawm nei thin bawk mah se France hian an si phurh a sut thei lo tluan a, an tla zui ta a ni.
Spain in Euro 2024 final an lut
