Spain King kut atanga Marquis title dawngtu Nadal
Ningani khan Spain lal King Felipe VI chuan a khua leh tuite zinga tennis great Rafa Nadal chu nihna zahawm tak ‘title of marquis’ an tih chu hlanin, chu chu infiamna huanga a thawhhlawk vanga pek a nih thu lal chhungkaw thupuangtu chuan a sawi.
|um 22 tehreng Grand Slam-a champion tawh chunga nikuma tennis inelna chawlhsan ta Spaniard Nadal hi tuna Spain lalpa ni mekin a rorel kum 10-na a lawm ruala mi paruk title a hlan zinga pakhat niin, marquis title dawng vete zingah pop-rock singer Luz Casal leh Paralympic swimmer Teresa Perales an tel.
Lal chhungkaw thuchhuah chuan tuna title an hlan takte hi Spain chawimawitute niin, an society-a a tha lama huhang nei lian ber berte an nih thu an tarlang.
World number one hlui Nadal hi tunah kum 39 mi niin, chawimawina (title) a dawn hnu hian a pianna, seilenna leh chen mekna thliarkar khawpui hming chawiin ‘Marquis of Llevant de Mallorca’ tih a ni tawh ang a, a thlah leh tuchhuan lo chhuak zel turte pawhin he title hi an chhawm thei dawn a ni.
Record khum leh harsa tak tawh tur siama French Open mipa singles title 14 la tling thei awmchhun Nadal hi thla hmasa mai khan Roland Garros-ah a ropui thinna tournament French Open khelh laiin chawimawi a lo ni tawh a, reh leh mai tawh lo turin Centre Court-ah a ke hniak hnutchhiahtir a ni nghe nghe.
Spain King kut atanga Marquis title dawngtu Nadal
