May 2018 atanga Fifa-in a suspend lai thlenga Spanish Football Federation president hna chelh Luis Rubiales chet dan chhuina chu Spanish high court judge hoa kalpui a ni ta.
Spain forward Jenni Hermoso chuan kar-liamta khan Women’s World Cup final lawm-man sem laia a phalna la hmasa loa a hmuia fawhsak ringawttu Rubiales lakah ‘legal complaint’ a thehlut a, kum 33 chuan a khinna lehkhaah fawh a tawh kha a phalna a nih loh thu sawiin, Rubiales thung chuan an pahniha inhriatthiamtawnna rahchhuah tiin a lo insawithiam tawh a ni.
Karhmasa khan ukil pakhat Marta Durantez Gil chuan Spain high court hnenah Rubiales laka lungawilohna hi Hermoso aiawhin a thehlut a, an complaint-ah chuan hmeichhiat mipatna lama intih-luihna kaihhnawih a nih thu tarlan a ni.
Thawhtanni khan Judge Francisco de Jorge of the National Court chuan complaint thehluh chu a pawm a, investigation kalpui turin magistrate pakhat ruat nghal a ni.
Spanish law hnuaiah chuan tuntuma Luis Rubiales an puhna (sexual assault) hi pawisa chawi atanga kum li thleng lung in tan theihna a ni.
Tarlan tawh thin angin, Pachuca player Hermoso chuan August ni 25 daih tawh khan social media kaltlangin thuchhuah sei tak a lo tichhuak tawh a, tah chuan world champion lawmna huna kiss a tawn kha a remtihna tel lo niin a sawi.
Spanish judge hoin Rubiales chhui tan
