Rajeev Ram leh Austin Krajicek tangdun chuan United States tan Paris Olympic Games kal mekah medal an hnaih tawh a, Nilaini khan champion thei tura rinkai Spanish pair Carlos Alcaraz leh Rafael Nadal hnehin Olympics men’s doubles quarter-final an paltlang.
Paris khuaa tennis khelhna hmun hmingthang Stade Roland Garros-ah hian hminglema ‘Nadalcaraz’ an tih mai Spain dream team Nadal leh Alcaraz inkawp chuan American pair lakah Olympic doubles gold medal an beisei mek an hloh fel der a, India thisen kai Ram leh Krajicek tangdun lakah 6-2, 6-4-in an tlawm.
Roland Garros hi Nadal-a tan French Open singles title 14 tehreng a hminna khelmual niin, he tlak lei senah hian khawvelah hun rei tak Mallorcan hian ro a lo rel tawh a, hliam neuh neuh avangin a vanglai pel chho tan tawh mah se kum 38 mi Nadal leh Spaniard mihrang ni tura rawn chawrchhuak tan mek Alcaraz inkawp hi kumin Olympic men’s doubles-ah na na na chuan la hlauhawm hle tura ngaih an nih laiin Court Philippe Chatrier-ah American fourth seeds ngam loin an tlawm a, Parisian clay-a Olympic gold medal pathum lak tlinna tumna Nadal chuan a puitlin zo ta lo.
2023 French Open doubles winner Krajicek leh Grand Slam men’s doubles champion tum li ngawt ni ve tawh kum 40 mi Ram inkawp kha an diau bik lo tlat a ni!
American pair Ram leh Krajicek hian gold medal match-ah Czech pair Tomas Machac leh Adam Pavlasek an su zui leh.
Spanish pair beiseina titawptu Ram-Krajicek
