cheithat leh bungraw thar lei nan cheng nuai 23 chuang sen a ni leh minister/ MLA quarters chei nan sum engemawzat sen chu, sum renchem leh sawrkar insawhngheh kum an puan mek bawhchhetu ah an tang tih MNF party chuan an sawi.
MNF Gen. Hqrs. thuchhuak chuan, PWD Building Division-in RTI Act hmanga zawhna a chhannaa a lan danin, ZPM sawrkar hnuah Assembly speaker bangla cheithatna leh bungraw lei nan Rs 23,40,000 sen a ni a. Bangla cheinan bik Rs 8,40,000 sen niin, bungrua – sofa, dining table, doormat leh a dangte lei nan nuai 15 sen a ni tih a sawi.
Chief minister Pu Lalduhoma’n sawrkarna an chan hlima thuthar thehdarhtute a kawmnaah, bangla chei nan sum hman vak vak tha a tih loh thu leh chutiang tih ve an tum loh thu a sawi laiin, speaker-in a bangla Rs 8,40,000 a a cheitir leh bungraw lei nan nuai 15 sawrkar sum a hmang chu a intuha lo hle a. Hei bakah hian minister leh MLA dangte quarters pawh cheithat a ni tih a sawi bawk.
‘ZPM hi an sawi loh ang hlirin an awm tih chu tlang hriat a ni tawh a. Mipui pawhin ngaiah kan nei tawh. Sum renchem leh sawrkar insawhngheh kumah an puang a. Anmahni ber a bawhchhetuah an tang zel hi a pawi hle. Sum indaih lohna avangin Zoram pum kawng chhe em em pawh an siam thei loa, sawrkarin vaibelchhe telin sum a puk reng a. Chutih laia bangla cheina tura sum tam tak a luang hi a uiawm hle,’ thuchhuah chuan a ti. An intiamna bawhchhiat an hreh lo a nih pawhin chhete talin mipui zah ve se an duh tih a sawi.
Speaker bangla-ah nuai 23.4 seng; Sum renchem kum an bawhchhia – MNF
