Speaker-in a dinhmun a hmangsual
– MNF
ZPM sawrkarin Forest Conservation Amendment Act 2023 hman a tumnaah Assembly speaker chu a dinhmun leh thuneihna a hmangsual tih MNF chuan an sawi a. Mizoramah leh state danga speaker la tih ngai loh a ni tiin, ngaihdam dil turin an phut tih an sawi.
MNF Gen. Hqrs. thuchhuak chuan, Assembly speaker Pu Lalbiakzama’n a dinhmun luah mek, speaker office-a press conference ko a, speaker dinhmun lo chelh tawh thinten political party office-ah pawh an sawi ngai loh, ruling party tanna sawhngheh tumin, House chhunga rorelna kalpui dan langsar taka tan lam neiin a sawi chiam tih a sawi.
‘Assembly House chhung leh pawnah pawh thu lai la tur, tan lam tilang lo tur leh House member zawng zawng zahawmna venghimtu tur berin press mite hmaah politics-a tan lam nei rana thu a sawi duh hi thil mak a ni a. House chhunga chief minister-in dawt a sawi, a hnua hailan leh tak mai sawimawi pui a tum dan enin, chief minister hian press conference nei turin a nawrlui em ni, tih zawhna a piang a. Ama thua press conference-a a thusawi hi a sawi a nih phei chuan nihna hmansualna leh speaker zahawmna venhim zawh lohna a nih avangin speaker atanga inhnukdawk ngam turah kan ngai,’ a ti.
Assembly speaker dinhmun chu India danpui hnuaiah pawh sawrkar laiin duh duha a thunun theih lohna turin venhimna fel tak pek a ni, tiin, ‘Assembly Secretariat hrang hlak siamsakin, an sum hman tur (budget) pawh House-in a vote pui ngai loa pek tura ruahman sa (charged) a ni a, mahnia thuneihna hrang nei (autonomous) anga din a ni. Speaker dinhmun luahtute hi Assembly House chhung leh pawn lamah pawh lai taka awm tura beisei leh ngaih an nih lai a, tuna speaker dinhmun luahtuin ZPM speaker ang maia press conference koa sawrkar awm tawhte beihna lam hawi leh, ruling party tanna sawhngheh tumna lam hawi a sawi chiam mai hi hmun danga thleng ve ngai lo, Mizoramah pawh la thleng ngai lo a ni,’ MNF thuchhuah chuan a ti.
Mizoram tana theihtawp chhuah mektu Joint Civil Society of Mizoram-in FCAA 2023 dodal a tum chu a thlawp tih a sawi bawk.
Speaker-in a dinhmun a hmangsual – MNF
