Mizoram Legislative Assembly Speaker Lalbiakzama chuan nimin khan press conference kovin, tunhnai August ni 27 & 28, 2025-a Session neih zawh taka sawi zui hlawh thil paruk a sawifiah. Pakhatnaah, zawhna chhan loh a tam tih chungchangah Speaker chuan, zawhna thenkhat chu Aizawl Secretariat-a hriat kim mai theih loh, district dang atanga lakkhawm ngai te a awm thin avangin a hun taka chhan hman a ni lo, a ti. Sawrkar kal tawhah te pawh zawhna chhan hman loh hi a awm thin a, hei hi thil awm dan pangngai a ni zawk, a ti bawk.
Speaker hian sawrkar hmasaa zawhna chhan hman loh dan tarlangin, INC (Congress) sawrkar lai 7th Assembly Session (2013-18)-ah zawhna chhan loh 23 a awm a; MNF sawrkar lai 8th Assembly Session (2018-23)-ah zawhna chhan loh 180 awmin; ZPM sawrkar 9th Assembly Session (2023-till date)-ah zawhna chhan hman loh 3 a awm, a ti.
Pahnihnaah, ‘list of business hmu tlai’ tih chungchangah Speaker chuan, a tuka business tur te member tin hnenah inpek thin a ni a, August 27, 2025-a neih tur kha a hma ni August 26, 2025, tlai dar 5:40-ah Mizoram Legislative Assembly website-ah leh MLA zawng zawng awmna Whatsapp group-ah dah a ni, a ti.
Session-a zawhna awmte ‘pawh’ (ballot) chungchangah, tun tum khan ballot hmuna kal member-te ngenna angin chhanna awm pawh awm lo pawh kan pawt vek a, ni 27.08.2025-a chhuak tur zingah, ‘zawhna chhanna dawn loh’ a awm avangin department lam pawh rang taka chhanna rawn theh lut tura ngen an ni a. August 27-a lut tur kha a hma zan August 26 dar 8 pelh hretah dawn a ni a, zan dar 10 pelh hretah sem chhuah a ni, a ti bawk.
Pathumnaah, ‘FCAA 2023 Resolution zirna hun kan nei lo’ tih chungchangah Speaker chuan, draft resolution copy chu Session tan hma ni 7-ah a hard copy MLA te pek vek an ni a; Mizoram Assembly website-ah pawh dah a ni, a ti bawk.
Palinaah, ‘FCAA, 2023 leh Rules copy-te pe lo’ tih chungchangah Speaker chuan, Session-a Resolution lut reng rengte hi a Resolution content bak Act leh Rules te member hnenah pek an ni kher lo, a duh chuan MLA library-ah an ngaihven a, public domain-ah pawh a duh apiang tan en theihin a awm, a ti bawk.
Panganaah, sawrkar hmasain FCAA, 2023 an lo dodal thua Chief Minister Lalduhoma dawt sawia puh chungchangah Speaker chuan, “Pu Lalduhoma khan dawt a sawi lo,” a ti.
Speaker chuan, Rule 137 of the ‘Rules of Procedures and Conduct of Business’ in a phut angin, Session-a Resolution-te hi Legislative Assembly-in official-in state sawrkar an hriattir tur a ni a, chumi ang chuan FCAA,2023 oppose-na resolution pawh kha Chief Secretary pek a ni a, Lok Sabha pawh library-a an lo vawn that atan pek a ni bawk, a ti. Legislature lamin Chief Secretary a hriattir khan Mizoram sawrkar tih tur a intan chiah a. Sawrkar kal ta khan hemi piah lam hi a hmalakna hriat a ni lo, a ti a. “Hei hi Chief Minister Pu Lalduhoman ‘sawrkar kal ta khan hma a la lo’ a tih lai kha a ni,” a ti bawk.
Paruknaah, House proceedings-a thu pass kalphung Speaker chuan a sawifiah a. Member-te hnena remti leh rem ti lo a zawhnaah, remti lo in awm chuan ‘remti lo’ ti rawh u ka tih khan remti lo tu mah an awm lo a, chuvangin kha Resolution kha ‘lungrual taka pass zinga ngaih a ni’ Speaker chuan a ti bawk.
Speaker-in Session kaih- hnawih thil 6 a sawifiah
