Special School din champha lawm
Ephatha Special School for the Deaf and Hard of Hearing din champha vawi 9-na chu Thawhlehni khan Aizawlah Ephatha Society of Mizoram for the Deaf and Hard of Hearing (ESOMDHH) chuan a buatsaih.
Hmanpuitu larsap Gen. Vijay Kumar Singh (Retd) chuan, nitinin classroom-ah thiamna, dawhtheihna leh ngilneihna an lantir bakah naupang inrintawkna leh hlimna pe in, an theihna inthup an haichhuah sak thin chu, an inpekna leh rawngbawlna a chhuang tih a sawi a. Bengngawng leh ri hriatna tha lo naupangte pual liau liau Mizorama school awmchhun chu hmangaihna leh thawhrimna hmanga hlawhtlinna a hmuh theih tih lantirtu a ni tih a sawi bawk.
Vohbik naupangte enkawl kawngah inchhung khura inenkawlnain awmze thui tak a nei tih larsap hian sawiin, “Hmangaihna leh an laka beiseina sang tak chuan naupangte chakna a pe a, harstanate paltlangin duhthusam an thleng thei thin a ni,” a ti.
Ephatha Special School for the Deaf and Hard of Hearing hi 2016 May 11-a din a ni a. Tunah principal 1, teacher 5, craft teacher 1 leh volunteer 1-ten zirlai 24 an enkawl mek. Class I atanga VIII thleng zirna awmin, Indian Sign Language (ISL) hmanga zirna kalpui a ni a. School dintu ESOMDHH hi bengngawng leh ri hriatna tha lote hamthatna ngaihtuahtu society ni turin 2012 February 28-a din a ni.
Special School din champha lawm
