Sports leh entertainment-ah Mizoram lam
hawi turin minister-in investor-te a sawm
Mizoram minister Lalnghinglova Hmar chuan India hmarchhak, a bikin Mizoram-in sports leh entertainment sector-ah theihna sang tak a nei tih sawiin, investor-te an lam hawi turin a sawm.
New Delhi-a Rising Northeast Investors Summit 2025-ah Sports & Youth Services minister hi a tel a. Inrinni khan “Unleashing the Potential of Entertainment and Sports in Northeast” session-ah thu sawiin, India hmarchhak chu state dangte nen khaikhinin ami cheng tlem leh a huamchin pawh zau lo tak tak ni mah se, sports leh entertainment-ah India leh rampawn thlenga dengchhuak thei mi engemawzat an chhuak tawh tih a sawi.
“India rama population 3% emaw chauh ni chungin, Rio Olympics 2016-a Indian contingent 7% dawn chu Northeast infiammi an ni a. Indian Super League season hnuhnung berah pawh player zat atanga 10% chu Mizo an ni. Hei hian sports-a Northeast India theihna a tilang,” a ti.
Mizoram-in Olympic 2036 Vision a nei tih sawiin, India-in Olympic 2036 thlen a tum tih an hriat rualin hma an la nghal a, nikum June-ah Olympic 2036 thlir chungin National-level Sports Conclave hmasa ber Aizawlah neih a ni tih a sawi. Infrastructure tihchangtlun bakah infiammi talent nei tha zawnchhuah a, India ram tihmingthatu tur chherchhuah an duh, tiin, investor-te chu thawhpuiah a sawm.
LESDE minister ni bawk Lalnghinglova Hmar chuan, hmarchhak state chu rimawi ngainatna hmun, Nagaland-a Hornbill, Arunachal Pradesh-a Ziro Festival leh state danga festival lian pawh music kaihhnawih zel a ni tih a sawi a. Investment lian zawk nen hmarchhak leh Mizoram music chu khawvel hriata phochhuah tlak a ni tih a sawi. Hmarchhak chu film siamna atan duhthusama hmun mawi a ni tih pawh sawiin, “Film tha tak pakhat chauh pawhin state tourism a chawikang dawrh thei a. Mizoram leh hmarchhak lam rawn hawi turin Bollywood film siamtute ka sawm a ni,” a ti.
Union minister for Youth Affairs & Sports Dr Mansukh Mandaviya pawhin sports leh entertainment sector chu inkawp tlat a ni tih a sawi a. Heng sector pahniha India hmarchhak hmasawnna atan sawrkar laipui chuan theihtawp a chhuah tih a sawi. Hmarchhak state-te pualin ‘Khelo India Northeast Games’ buatsaih tuma hma lak mek a ni, tiin, hmasawnna lian leh awmze nei tham thlen turin corporate nena thawhdun pawimawh zia a sawi bawk.
He session-ah hian India national footballer hlui Bhaichung Bhutia bakah Sports Authority of India hotute, entertainment industry-a expert-ten hmarchhaka sports leh entertainment sector hmasawnna tur an sawi a ni.
Ministry of Development of North Eastern Region (DoNER) buatsaih ‘Rising Northeast Investors Summit 2025’ hi May 23 khan Prime minister Narendra Modi chuan hawngin, a hawnnaah hian Mizoram chief minister Lalduhoma a tel a ni. India ram hmun hrang hrang atanga investor fuankhawm hmaah, sector hrang hranga India hmarchhaka theihna awm sawiho a ni.
Sports leh entertainment-ah Mizoram lam hawi turin minister-in investor-te a sawm
