April 2, Thawhleh zan khan English Premier League 22023-24 khelh chhunzawm a ni a. West Ham United lakah an chak zawh loh vangin Tottenham Hotspurs in top 4 huanga kir leh theihna hun tha an hloh. Thawhleh zana inkhel dangah Nottingham Forrest chuan an mualah hnehna an chang a, EPL-ah cham chhunzawm theih beiseina thar an nei.
Panganaah awm mek Tottenham chu West Ham hmachhawn turin London Stadium-ah an leng lut a. Hammers lakah an chak a nih chuan an chung chiaha awm Aston Villa point hmuh zat an nih rual ang a, an chak dan a zirin Villa lehpelh theihna hun tha an nei. Chak mamawh tak chunga an lenluhna London Stadium-ah goal thun hma viau mah se an hmahruaina an humhim zo lova, uiawm takin an chak zo lo.
Tottenham hian mikhual an nihna hmunah bul an tan tha viau a, inkhel tan atanga minute ngana lekah Brennan Johnson chuan Timo Werner siamsak atangin hmahruaina goal a thun. Hma taka goal an thun vangin Spurs an phur viau a, chak theih beiseina an nei sang hman hle nghe nghe.
An mualah ngei goal chhuah hma viau mah se David Moyes-a team West Ham an insiamtha thuai a, an buai rei lo. Minute 19-na lekah defender Kart Zouma chuan Bowen siamsak atanga goal thunin an si phurh a sut. Goal khat ve ve an thu hnuin inkhel a hmuhnawm zui viau a, goal thun tumin an innawr tawn nasa hle. Goal thun tumin tan khawh nasa dun viau mah se goal an thun belh thei lo ve ve a. Minute 19 chhunga goal khat ve ve an thun hmangin an inhnehtawk.
West Ham lakah an chak zawh loh vangin Tottenham hian Aston Villa nih rual an tumna an puitlin zo lo. Palinaa awm mek Villa hian nilai zan khan Manchester City an hmachhawn a. Champion lai lakah an chak lo a nih chuan panganaa tlahniam thei dinhmuna ding an ni naa Tottenham an chak zawh loh vangin palinaah an awm chhunzawm ngei dawn ta thung.
Forrest beiseina thar
Tlahniam thei dinhmuna ding mek Nottingham Forrest chuan City Ground-ah Fulham an mikhual a, an mualah 3-1 a hnehna changin, point thum hlu tak an hmu. Fulham laka point thum an hmuh hmangin relegation zone an chhuahsan a, him theih beisein sang zawk an nei thar.
Chak mamawh Forrest hian an mualah bul an tan tha viau a, inkhel tan atanga minute 9-na lekah Gibbs-White siamsak atangin Callum Hudson-Odoi chuan fuh zetin a pet goal a, hmahruaina goal a thun. Hma takah goal an thun vangin phur takin an mualah an inlan a, chawlhlawk hmain goal hnih an thun belh leh hman.
Forrest hian hmahruaina goal a thun atanga minute 10-na chiahah goal dang an thun belh leh a. Chris Wood chuan minute 19-naah Santiago Costa dos Santos siamsak atangin an goal hnihna a thun. Goal lut a han deuh vang vang hnuin Morgan Gibbs-White chuan Danilo chawlhlawk dawn hnaih minute 45’+3-ah an goal thumna a thun a, si thum faia hmahruai chungin chawlhlawk an hmang.
Si thum faia ngawta hnufual tawh Fulham in an khingpuite lehthal ngei tumin thapui an thawh a, second half-ah an khel tha hle. Second half tan atanga minute lina lekah Tosin Adarabioyo chuan Pereira siamsak atanga goal thunin an si phurh a sut then. Tosin goal thun hnu hian goal dang thun belh tumin tan an khawh nasa hle a, an vanneih ni a ni lo a, goal dang an thun belh thei lo. Nottingham Forrest hian chawlhlawk hmaa an goal thun an chakpui zui ta a ni.
Fulham hnehtu Nottingham Forrest hian khelh 31 atanga point 25 hmuin relegation zone an chhuahsan lailawk a. An lehpelh tak Luton Town nen an inkarah point thum a tla zep mek. Luton ai hian vawi khata an khelh tam zawk vangin Forrest dinhmun a him rih lo viau thung.
Result dang
Thawhleh zana inkhel dangah Burnley leh an mikhual Wolverhampton Wanderers chu 1-1 in an inhnehtawk a. Hun tawp dawn hnaih minute 88-naa Dominic Calvert-Lewin goal thun hmangin Everton in Newcastle United lakah tlawm an pumpelh hram a. Hetihlai hian AFC Bournemouth chuan minute 79-naa Justin Kluivert goal thun hmangin an mikhual Crystal Palace chu si khat faiin an hneh ve thung.
Spurs in Villa nihrualna hun tha an hloh
