SRK Billionaire a ni ta
Khawvela entertainer hausa ber
Bollywood superstar Shah Rukh Khan, kum 59, chu khawvela mihausa tawntaw, Billionaire zingah a tel chhiar tel a ni ta a, Taylor Swift lehpelin khawvela entertainer zinga hausa berah an chhal.
Hurun India Rich List 2025 chu October ni 1, 2025 khan an tichhuak a, he list-a a landan chuan Shah Rukh Khan hausakna hi dollar tluklehdingawn 1.4 (cheng vaibelchhe 12,490 vel) a tling a, Huran report-ah chuan SRK hi a vawi khat nan billionaire zingah chhiar tel a ni ta a ni.
Billionaire nih hi thil awlai lo tak a ni a, entertainment khawvel atanga billionaire ni thei te pawh kutzungtang thliaka chhiar tham lek tak tak an la awm a, khawvela zaithiam tunlaia huhang nei lian ber Taylor Swift meuh pawh nikum khan billionaire a ni thei chauh a, Swift hausakna hi dollar tluklehdingawn 1.3 niin an chhut. Swift hian ‘The Eras Tour’ hlawhtlinna zar zoin, rimawi ngawr ngawr (thildanga sumdawnna tel lo) atanga billionaire ni thei hmasa ber a ni.
Khawvela actor hriathlawh Arnold Schwarzenegger pawh dollar tluklehdingawn 1.2 nei anga chhutin, billionaire list-ah hian a lang a, Jerry Seinfeld nen an hausakna hi intluk angin an tarlang. Rihanna pawh a sumdawnna leh rimawi atanga a sum hmuh te nen billionaire a ni a, a hausakna hi dollar tluklehdingawn 1.4 te pawh a kai hman a, mahse, tunhnaiah a hausakna a tlahniam deuh a, mahse, billionaire zingah chhiar tel a la ni tho.
Shah Rukh Khan hi India-a actor zinga hausa ber a ni rei tawh viau a, Indian celebrity dangte nen pawh an hausakna hi a la inthlau telh telh zel rih a ni. Indian actor zinga SRK dawttu chu lemchan lama a hmel kan hmuh ngai tawh loh, Juhi Chawla niin, ani pawh hi sumdawnna lama SRK nen thawk dun reng an ni a, Juhi hausakna hi cheng vaibelchhe 7,790 niin an chhut a, Hrithik Roshan chu pathumna niin, a hausakna cheng vaibelchhe 2,160 a ni a, Karan Johar (cheng vbc 1,880) leh Amitabh Bachchan (cheng vbc 1,630) te pawh top five-ah an lang.
SRK Billionaire a ni ta Khawvela entertainer hausa ber
