SSU-in darkar bi-a inhlawh theih
dan dappui turin sawrkar a ngen
Students’ Self-Support Union chuan zirlaite an intodelh theihnan leh ramin hma a sawn theihnan darkar bia inhlawhna sawrkar ruahmanna in mumal taka kalpui dan ruahman pui turin chief minister an ngen.
SSU Gen. Hqrs hruaitute chuan Zirtawpni khan chief minister Lalduhoma an hmu a, an thu thlen zingah darkar bi-a inhlawh theihna dap pui tura ngenna hi a tel a. Mizoram sawrkar enkawl sikulten hma an sawn lehzualna atan sikul tha thlan thin nise, Samagra hnuaia computer zir mek chu tun aia tha zawka kalpui a nih theihnan subject pakhat anga regular class lak nise, tiin an rawt.
SSU chuan ‘The Mizoram Prohibition of Beggary Bill 2025’ pass a ni chu lawmawm a tih thu sawiin, Sairang thleng rel lo lut turin hnamdang kutdawh tam tak a rawn chhawm tel a hlauhawm avangin sawrkarin invenna lo ruahman lawk se, Mizoram-a kutdawh awm sa tlemte tan skill development kaltlanga eizawnna mumal an neih theihnan ruahmanna siam nise, an ti.
Thlai thar lei chungchangah sawrkar hmalakna lawmawm an tih rualin, loneitute an hlawk leh zual theihnan rate siam chi leh chi loh sawrkarin uluk zawkin thliar hrang thei se, tiin a thlen bawk.
Chief minister hian SSU hruaitute rawtna thlen hi a tul anga a lo enzui tur thu a sawi a, rawtna thenkhatah chuan sawrkarin ruahmanna fel tak a siam tawh tih a lo hrilh a ni.
SSU hian Chief Minister’s Relief Fund-ah Rs. 5000 an chhunglut nghal a ni.
SSU-in darkar bi-a inhlawh theih dan dappui turin sawrkar a ngen
