1983-a Return of the Jedi film-a Princess Leia (Carrie Fisher) gold bikini hak chu an lilam a, dollar 1,75,000 (Rs 1,46,55,000 vel)-in an hralh. Heritage Auctions-in July ni 24-25 khan Hollywood/Entertainment Signature Auction neiin, hetah hian Star Wars thil hlui te pawh an lilam nual a, chung zingah chuan Carrie Fisher-i hak ‘Slave Leia’ bikini an tih mai pawh hi a tel.
He costume hi Nilo Rodis-Jamero design niin, Richard Miller-a siam a ni ve thung a, Fisher chuan, “Director (George Lucas)-in he outfit min entir khan a fiamthu ni turah ka ngai a, min tizam khawp mai a. Ka hnungzangah chuar a awm thiang lo va, chuvang chuan ngil auha ka thut a ngai a, chuar chhete tak tak pawh a awm thiang lo a, chuvangin ngil leh khawng thei ang bera ka thut a ngai a ni tawp mai,” tiin he bikini chungchang hi 2016 khan NPR-in an kawmnaah a lo sawi tawh a ni.
He lilamnaa hian 1977-a Star Wars Episode IV: A New Hope tawp dawna indona a an man Y-wing model pawh an lilam a, he model hi Colin Cantwell siam a ni a, ‘TIE Killer’ tiin a hming an phuah a, dollar maktaduai 1.55-in an hralh thei a, Star Wars thil hlui lilamnaa hralh to theihah a pathumna a ni.
‘Star Wars’-a Carrie Fisher bikini hak $1,75,000-in hralh
