State Boxing Championship
Mizoram Boxing Association (MIZBA) leh Hnahthial District Boxing Association (HADBA) tangkawpin an buatsaih 43rd State Boxing Championship 2024 chu Inrinni zan khan GSA Hall, Hnahthialah zaeh fel niin, kharna hun hi khuallian niin South Tuipui bialtu MLA Jeje Lalpekhlua’n a hmanpui.
He championship-ah hian district zawng zawng atangin mipa 186 leh hmeichhia 33 an chhuak a; hmeichhe team-ah Aizawl SAI chuan gold medal paruk, silver pakhat leh bronze medal pakhat lain a pumpuiah team champion an ni a, pahnihna lawmman chu Lunglei SAI-in an la thung.
Mipa team champion Lunglei SAI kutah gold pakua, silver pali leh bronze medal pakhat a lut a; pahnihna lawmman chu Aizawl SAI-in an la.
Best boxer hmeichhiaah Lalrinngheti, Aizawl SAI thlan niin, mipaah Lalhruaitluanga, Hnahthial thlan a ni.
A thlengtu Hnahthial district bik hian a pumpuiah gold medal pahnih, silver medal pathum leh bronze medal pathum bawk an hui.
Kharna huna khuallian Jeje Lalpekhlua chuan Hnahthial district-a state pum huap boxing championship nghah a ni chu lawmawm a tih thu sawiin, boxing chu sports zingah pawh taksa hrisel leh fit that ngai berte zinga mi a nih avangin insum theihna leh tih hram hramna nun neih a pawimawh thu a sawi a, chumi a nih vang chuan boxer-te chhuanawm a tih thu sawiin, nun entawntlak nei zel turin a chah nghal.
India football team striker hlui hian boxer-te fuih chhunzawmin, boxing an tuipui tak tak a, national level thlen phak an duh a nih chuan chhuanlam siam loa theihtawp chhuah turin a chah a, a tum tak takte chu sawrkarin puih a inhuam reng thu sawiin, Hnahthial district chu sawrkarin a thlahtlam bik dawn loh thu a sawi bawk.
Boxing championship kharna hunah hian MIZBA member-te leh HABDA member-te bakah Hnahthial SP Manny Bhushan Singh leh Addl SP Beimosia Lapi an tel ve bawk.
State Boxing Championship
