MNF general secretary Zodinpuia chuan, sawrkarin peace city project a buaipuinaah thu zep ruk a nei nia sawiin, “Chief minister Pu Lalduhoma hian sawrkar laipuia sum dilna atan Mizoram state capital Aizawl chu sawn turin ngenna a lo thlen reng a, hei hi tun thlengin mipui hmaah a zep tlat a ni,” a ti a. Mipui rawn lo leh puangzar lova Mizoram state capital chu Aizawl atanga Thenzawl-a sawn tumah ZPM sawrkar chu a puh a ni.
Kumin April 24 khan sawrkar laipui Housing and Urban Affairs Section officer (AMRUT-IIB) Seema Rani chuan Mizoram chief secretary leh New Delhi Mizoram House resident commissioner hnenah, “shifting of state capital from Aizawl to Thenzawl, Mizoram” tiin, detail project report siamna tur lehkha a thawn tih a sawi a. Hei bakah hian sawrkar lehkha an hmuh theih dangah pawh Mizoram state capital sawnna tur thu hi a chuang, tiin a sawi bawk a ni.
Peace City chungchang hi chief minister hian kumin April thla tir lama Vantawng Group YMA inkhawmpui a hmanpuinaah khan a sawi chhuak a. Khatah kha chuan state capital Aizawl sawnna tur tih sawi rik a awm lo va, ‘Muanna Khawpui’ (Peace City) tih a ni tawp a. Chief minister-in a sawi dan chuan, 16th Finance Commission a sawipui tawh thu te, Ministry of Housing and Urban Affairs-in Master Plan siamna senso tur cheng vaibelchhe 10 a remtih thu te a ni a. A hnu zelah pawh Peace City chungchang ngaihtuah a nih hian, ‘state capital Aizawl sawnna tur’ tih hi sawi rik zui a awm ngai lo. Hriat zui zel dan chuan, sawrkar laipui lam hian cheng vbch 10 hi a sanction tawh a, heta tanga cheng vbch khat (10%) chu a released tawh, tih a ni.
Eng pawh ni se, state capital Aizawl dinhmun hi sawi duah ngai lovin kan hria a, khawpui din a nih dan pawh kan hria a, Planned City a nih loh dan te pawh kan hre vek. Eng pawh mai hi ruahmanna mumal awm sa lo hnuaia din vek a nih avang hian chhiatna hrang hrang kan tawk reng a. State capital thar kan din thei a nih chuan a tha a, kan din thei lo a nih pawhin, khawpui thawlh thawlna tur kan ngaihtuah hi chu tihmakmawh a ni tawh hrim hrim.
Langtlang taka thil kalpui a nih loh hian a hnuah kan buai ziah zawng a nih hi!
