Mizorama tipper neitu leh khalhtu intelkhawmin Assam-a balu an lak thin chungchangah lungawilohna neia balu phur tura kal an chawlhsan bakah state pawn balu lakluh tur an dan mek chu an la chhunzawm zel.
Tipper hmanga eizawngtu pawl pathum intelkhawmna – Mizoram Tipper Joint Action Committee hian an chunga hleih nei taka Assam lam thuneituten ro an rel thin avang leh sum an chawitir thin avanga lungawiloin kumin August atang khan Assam lama balu an zuk phurh thin chu an chawlhsan a, heng hmun atanga Mizorama balu phurh luh tum pawh an dang.
Hetiang a nih mek lai hian an member zinga lirthei 14 chuan tunhnai khan an inkaihhruaina dan bawhchhia in state danga balu an phurh avangin sumfai an chawitir tih an sawi a. Phur nawn leh tawh lo tura intiamkam tir an nih bawk hnu ah kal tir an ni tih an sawi.
State dang atanga Mizorama balu phurh luh a rem tawh thu an puanzar hma loh chuan phur lui lo turin an inngen tih Mizoram Tipper JAC hian sawiin, balu mahalder-te nen inremna fel tak neih a nih hnuah chauh state dang balu chaw lut turin an inngen nawn tih an sawi a ni.
Mahalder nia inchhalten permit fel tawh anga an puangzar thin chu thudik tawk lo a nih avangin JAC-in hriattirna an chhuah hma loh chuan balu phurh luh a him lo tih an sawi.
State dang balu la phur lo zel Thu awihloa phur lui inhrem
