Mizoram-in state a hmuh ni – February 20 denchhenin State Day of Prayer Committee bultumin Zirtawpni khan Mizoram hmun hrang hrangah ram tana chawngheiin tawngtaiho a ni. State Day of Prayer hi kum 2024 atangin state sawrkar bul tanin State Day of Prayer hi thupui bik neia hman tan a ni a; kumin hi a tum thumna niin kumin thupui chu “I din thar leh ang u” (Nehemia 2:17) tih hman a ni.
Aizawl Lammuala hun hmana thusawitu chief minister Lalduhoma chuan, kumin thupui “I dinthar leh ang u” tih a ni a, din thar lehna dal thintu lian tak pakhat chu beidawnna a ni, tiin, mimal nunah beidawnna in min nuai thin a, chhungkuaah leh rawngbawlnaah beidawn rum rum chang a awm a; khawvela NGO nei tha ber pawla kan inchhal laiin thenkhat chu kan NGO-ah pawh kan beidawng tan nia a lan bakah mi engemawzat chu kohhranah pawh kan bei a dawng nia a lan thu a sawi.
Mi tam tak chu kan ram hruaitute ah kan bei a dawng a, hruaitute duhkhawp lohna leh ram rorelnaa phunnawina hmuh tur a tam a. Tu party pawh sawrkar se eng an nih chuan ring lo, he beidawnna ri hi a ring hle, tiin, hei hi kan dinhmun a nih chuan ‘vei’ a ngai a, a veitute hmel kan hmu tan ta tih a sawi bawk.
“Kan ram din thar lehna tura kan hmanrua tur chu beiseina a ni a. Mizorama cheng mi tlemte hi enkawl theih, chinfel theih tur kan ni. Beidawnna hi Setana hmanrua a ni a, beiseina hi Pathian hmanrua a ni,” a ti.
A tha zawnga, India ram state zingah pawha Mizoram-in hma a sawnna leh chanvo tha a chan chhoh hrang hrang chief minister hian a sawi a. Mizoram mipui tawngtaihona rah an hmu zel tih a sawi a ni.
State Day of Prayer hi district headquarters tinah leh khaw hrang hrang bakah Mizoram pawn lam thlengin hmun engemawzatah hman a ni.
State Day pualin chawngheiin tawngtai
