State puitlinga Mizoram puan a nih champha vawi 36-na, ‘State Day’ chu Thawhtanni khan district khawpui hrang hrangah hman a ni a. Aizawlah chuan chief minister Zoramthanga hoa hman niin, kan state ralmuanna leh remna chu state dangin an awt hle tih a sawi.
Mizoramin kum 36 chhung state nihna a chang ta chu lawmawm a tih thu chief minister hian a sawi a. Hmanlai pi leh pute hunlai atanga Mizorama an lo thlangtlak dan leh tuna Mizoram a lo indin chhoh dan sawiin, rambuai harsatna tinreng paltlangin vawiina remna leh muanna duhawm tak hnuaia hun kan hmang thei hi Siamtu’n chhan neia a rel vek a ni tih a sawi.
Mizoram chu Pathianin Zofate tan a lo duan lawk a nih thu sawiin, he rama chengte chu tawng khat hmang, rinna thuhmun kan ni tih a sawi. Mizoram chhungah hausakna la haichhuah loh nasa tak a awm tih sawiin, midang tan malsawmna ni thei tura chu malsawmna haichhuah chu tu dang kutah niloin keimahni kutah theuh a awm tih a sawi bawk.
“Rambuai hreawm leh hautak ber kan patlang hnu a, ram ralmuang ber leh remna tha ber entawn tlak kan ni thei hi state dang ten min awt hle a, rambuai hreawm tak kha Pathian min ‘baptist’ na a ni,” Zoramthanga hian a ti.
Hmasawnna chu thawklehkhata thleng vek thei ni lo mah se, a rahbi thiam taka kan zawna kan kalpui a tul a, chu chu mithiamte tan chona nise, tiin chief minister hian a sawi a. Sawrkar hotute chu Mizoram tan theihtawp chhuah turin a sawm.
Inkhawm kaihruaitu chief secretary Dr Renu Sharma chuan State Day kum 36-na lawm a nih hian state hmasawnna tam tak hmuh theih a nih rualin, hmabak tam tak, a bikin industrial sector leh entrepreneurship tihhmasawn lamah a la awm tih a sawi a. Mizoramah khawtlang nuna bet tlat tlawmngai pawl leh kohhran pawimawhna avangin sawrkar inrelbawlna kawngah thui tak a puih thu leh awlsamna a siam thu a sawi.
NGO Coordination Committee chairman, Central YMA president R Lalngheta pawhin ram hmasawn zelna atan mitinin mawhphurhna kan nei tih State Day-ah hian hrechhuak thar leh tura mipui sawmin, sawrkar hruaitute leh sawrkar hnathawktute chuan Zoram dah pawimawh hmasa ber a, hlemhletna telloa hna an thawh pawimawh a tih thu a sawi.
State Day lawmnaah hian deputy chief minister Tawnluia, Assembly speaker Lalrinliana Sailo, minister-te leh MLA bakah sawrkar hotute an tel a ni.
State Day vawi 36-na hmang Remnaah state dangin min awt – CM
![](https://theaizawlpost.org/wp-content/uploads/2023/02/cm-1-1024x682.jpg)