Hnamdang (Vai) sumdawngte leh Myanmar lam mi dan zawm loa sumdawngte tih rem a nih theih nan sumdawng pawl intelkhawm chuan sawrkar thuneitute chakna ringa tihrem dan kawng zawn an tum tih an sawi.
Mizoram Merchant Association (MIMA) Gen. Hqrs. chuan Mizo sumdawngte chimrala kan awm mai loh nan hnamdang dan loa sumdawngte bakah Mizorama himna zawnga foreigner lo lutten duh duha dawr an hawng chu tha lo an tih thu a sawi.
‘Heng mi, dan loa sumdawng (Vai) te hian tax an pe tha lo hle a. Hei bakah hian Myanmar sumdawngten tax an pe lo mai ni loin, Myanmar leh China bungrua an lalut nasa a, an duh duhna hmunah dawr siamin an sumdawng a. Heng zinga mi thenkhat hi serh leh sang nei lo, Mizoram mi, Mizo sumdawng China leh Myanmar-a kalte tih duh ngai loh, bungraw karah danin phalloh thil (contraband) zeh ruk pawh pawi ti lo, zehruk pawh awm ngeia ringin ruihhlo thlenga a tam phah rin a ni a, tihrem dan chungchang thlen kan tum,’ a ti.
Mizoram chu hnamdangten economic-ah min chimral chho zel a, dawrkai bungrua mai ni loin bawngsa, sa dang leh ar note, thlai, panhnah, kuhva leh a dangte thlengin chimralna kawng min zawhtir mek tih MIMA hian a sawi a. Remchang hmasa berah chief minister, ILP changtu minister, Commerce & Industries minister leh minister dang pawh hmuh a, hnamdang dan loa sumdawngten mi an chimral dan, chumi tihrem nana hmalak dan tur leh 2years validity ILP leh ILP Mizoram tan tha zawka hman a nih theih nan ILP Board din chungchang rawtna thlen an tum tih a sawi bawk.
State pawn mite dan loa sumdawnna tihrem a tul – MIMA
