State pawna hna thawk tura
training chhuak mi 26 thlah
Mizoram Youth Commission leh Honda India Foundation tangdun buatsaih, Project Buniyaad Hotel Management (Food & Beverages) training chhuak, state pawna thawk tur Mizo thalai 26 chu Zirtawpni khan MYC chairman Malsawmzuala Ralte chuan a thlah.
MYC chairman chuan an hnathawhna hmun theuhah rinawm turin a chah a. Hotute duhsak tlaka hna thawk tura fuihin, midang tana kawng satkawtu an nih anga Mizote tihmingthatu nih tum turin a chah bawk. Chhel taka awm tur leh mahni inthunun tura fuihin, hlawh hmu tlak ngeia hna thawk turin a fuih. Hna thawka chhuak turten an kalna tur leh a kaihhnawiha zawhna an neih chu chhan a ni.
MYC office-ah hian an thawhna turte hian rawn kalchilhin, interview an neihpui hnuah training zawng zawng hi an thlang vek a. India ram chhung hmun hrang hrang – Fairmont (Udaipur), Choki Dhani (Jaipur, Jaisalmer, Indore), Orange Tiger (Goa), Sarvar Hotel (Hyderabad) leh Status Club (Kanpur) ah an insemdarh dawn a ni. Mi 26 – mipa 9 leh hmeichhia 17 an ni.
Project Buniyaad Hotel Management (Food & Beverages) training hi kumin September 18 khan chief minister Lalduhoma chuan a hawng a. Hemi hnuaiah tho hian tunah MYC hian F&B Training hi Aizawl Centre-ah 2nd batch a kalpui mek bakah Lunglei Centre-ah training hi kalpui mek a ni bawk.
Kumin December atang hian Aizawlah 3rd batch kalpui leh tum niin, training chhuakte chu Aizawl hmunah ngei India ram hotel changtlung tak tak neituten rawn kalchilhin an hnena thawk tur mi an rawn thlang leh dawn a ni.
State pawna hna thawk tura training chhuak mi 26 thlah
