January 11 khan Mizorama Sap missionary Sap Upa leh Pu Buanga ten Mizorama chanchintha hril tura an rawn thlen ni, Missionary Day a ni a. Mizoram sawrkar chuan state ni pawimawhah chhiarin sawrkar chawlha hman thin a ni.
Mizoram Baptist Kohhran chuan Missionary Day vawi 130-na thupui atan “Kohhran Lungpui – Chanchin Tha Hril” (Marka 16:15) tih hmangin inkhawm a buatsaih a. Zing lamah Pathian hnena lawmthu sawi inkhawm neiin thupui thlansa hmangin thuchah ngaihthlak a ni. Chawhnu lamah Pathian faka zaikhawm programme siamin, kohhran engemawzat chuan tlai lamah Missionary Day lawmna ruai an kilho. BCM Hqrs hruaitute chuan tualchhung kohhran hrang hrangah hun an hmanpui a ni.BCM general secretary Rev R Lalbiakliana chuan Missionary Day hi Zofaten chanchintha kan dawn avang leh chanchintha avanga chhandamna leh malsawmna kan dawn hre thar chung a, Pathian hnena lawmthu sawina atan hmang turin kohhran hote a chah.
Kum tina tih thin angin Zarkawta Sap missionary-te hriatrengna lungdawhah Ningani zing khan Missionary Day pualin hun hman a ni a. Zarkawt Presbyterian Kohhran chairman Upa Lalzamliana’n kaihruaiin Dawrpui (Presbyterian) bialtu pastor F. Lalhmingthanga’n thuchah a sawi. Aizawl East BCM bialtu pastor Rev C Chhuntluanga’n malsawmna in kalkhawmte a tin a ni. He hunah hian Zarkawt Presbyerian kohhran bakah BCM leh Salvation Army atangin kohhran mi thahnem tak an tel a ni.
1894 January 11-ah Robert Arthington tirhin Zosap missionary Sap Upa (FW Savidge) leh Pu Buanga (JH Lorrain) ten Sairang rawn thlengin, Aizawla kum thum an awm hnu ah 1903 March 8-ah Baptist Missionary Society tirhin Mizoram chhimlam an lut leh a, Serkawn Lungleiah awmhmun an khuar a ni. Kum 1989-ah Mizoram sawrkar chuan kohhran pahnih – Presbyterian Church of India leh Baptist Church of Mizoram ngenna angin January 11 chu Missionary Day-ah puangin sawkar chawlha puan zui a ni.
Presbyterian kohhran hian kohhran din tan ni atan hmangin zan lamah inkhawm an buatsaih thin thung a ni.
State pumah Missionary Day hmang
