BJP-in Mizorama MLA pahnih a neih bakah Mara Autonomous District Council-a sawrkarna a siam chungin, state sawrkarin fahrawn ang maiin a en tih State BJP hruaitute chuan Lok Sabha speaker Om Birla hnenah an sawi.
Mizorama lo zin Lok Sabha speaker hi Zirtawpni khan BJP Mizoram State president Vanlalhmuaka bakah BJP MLA pahnih – K Hrahmo leh Dr K Beichhua ten an hmu a. Mizoram politics dinhmun leh state sawrkarin hmasawnna hna a kalpui mek dan an sawipui.
Tunhnaia Mizorama ruahsur nasat avanga kawng chhiat dan, Cyclone Remal atanga tui leh eng chungchangah mipuiin harsatna an neih dan, tunhnaia tuialhthei leh buhfai man tihsanin mipui mimir a nghawng dan tur, sawrkar hmasa atang tawha vawiin thlenga PM Scheme kalpui mumal a nih loh dan, PM Scheme hi state-a sawrkar apiangin party vote zawnna atana an hman dan, tun ang renga Mizoram kawng chhiat avanga mipui tawrhna a la awm ngai loh thute a hrilh.
Heng bakah hian central institution, a bikin NIT, Vety College Selesih, Horticulture College Thenzawl, RIPANS-a khum 100 awmna hospital siam mek, Mizorama 4-lane Vairengte to Aizawl siamna kawnga harsatna awm leh rel kawng chungchang an sawipui a. Hetih rual hian MADC ah BJP-in MLA pahnih leh District Council sawrkar an neih dan leh state sawrkarin fahrawn ang maia a enkawl dan an sawipui bawk.
Lok Sabha speaker chuan an thu thlen chu a chhinchhiah tih a sawi a. New Delhi-ah a bawhzui theih nan State president chu ziaka a hnena pe turin a hrilh. BJP hmasawnna turin Mizoramah Sabke Sath, Sabke Vikas (Mi tin tan an mamawh ang hmasawnna) a thlen theihna atan theihtawp a chhuah a tur thu a sawi bawk.
State sawrkarin fahrawn angin min en – State BJP
