Opposition Members of Parliament pasarihte chuan Apple tena an iPhones te chu ‘State-sponsored attackers’ tena an tum bik theih thu an hrilh thu an sawi.
Heng thu sawitu zingah hian Shiv Sena (Uddhav faction) MP Priyanka Chaturvedi, Trinamool Congress’ Mahua Moitra, Congress’ Pawan Khera leh Shashi Tharoor, CPI(M) Sitaram Yechury, AAP’s Raghav Chadha leh AIMIM chief Asaduddin Owaisi te pawh an tel a. Moitra chuan Akhilesh Yadav pawhin chutiang warning chu a dawn thu a sawi a, mahse Samajwadi party chief chuan engmah a la sawi chiang ve lo thung.
Novelist leh newspaper editor Sriram karri pawhin a email-ah a iPhone chuan state-sponsored attack a dawn mai theih thu hrilh a nih thu a sawi bawk a. Chutiang bawkin Samir Saran, president of thinktank Observer Research Foundation chuan a sawi ve bawk.
“ALERT: State-sponsored attackers may be targeting your iPhone” tih chu MP rual te chuan an dawn vek thu an sawi a.
“Apple chuan state-sponsored attacker tena i iPhone leh Apple ID te chu an thlurbingin a hrai a ni. Heng attackers te hian mimal takin tu nge i nih an hriat chian avang leh eng nge i tih tih an hriat chian avanga tumbik che an ni a. State-sponsored attacker tena i device an lut thei a nih chuan i data pawimawh, communications, i camera leh microphone te pawh a rukin access an nei vek thei a. False alarm a nih theih rualin ngai thutak tura ngen i ni,” tiin message an dawn chuan a tarlang.
India sorkar a inrawlh tia sawi chian a ni lo : Apple
He alerts tihchhuah chungchangah hian company chuan sawifiahna siamin, “Apple chuan he threat notification hi state-spnsored attacker tih a ni tiin a sawi kher lo,” tiin a sawi thung.
“State-sponsored attackers te hi sum hnar pawh nei tha leh hmanrua pawh nei tha an ni a, tum tam tak chetlakna nei tawh an ni bawk. Heng attacker te hi intelligence signal a innghat an ni a, a famkim ngai lo thung. Apple threat notification te hi false alarm a ni thei a, attacker thenkhatte hi hriatfiah loh pawh an ni thei. Tunah chuan he threat notification kan tihchhuah chhan hi kan sawi mai thei lo va, a chhan chu state-sponsored attackers te chu fimkhur leh inralring tura a siam theih zawk vang a ni” tiin thuchhuah siam chuan a tarlang a. Apple chuan Threat Notificatoion hi mimal hrang hrang ram 150 vel dawna miteah a thawnchhuak a ni.
Apple thupuangtu chuan India sorkar chu a inhnamhnawih emaw tiin an sawi lo tiin a sawi a, mahse, a inhanmhnawih miah lo an ti thei hek lo tia sawi bawkin tuna ‘state-sponsored attacker’ tia an sawi hian India sorkar an sawina a ni kher lo, tiin an sawi bawk.
Apple te chuan Indian government chuan heng alerts tihchhuahah hian zawhna a nei emaw hetianga hack tumna chungchangah hian information awm thei te pek a tum em tia zawhna chu an chhang lo thung.
Investigation kalpui nghal a ni : Ashwini Vaishnaw
Minister of Electronics and Information Technology Ashwini Vaishnaw chuan Bhopal-ah sorkar chuan he Apple alerts vang hian chhuichianna a kalpui nghal tiin a sawi a. Vaishnaw chuan Apple alert cvhu ram 150 chuangah thawnchhuah a ni a ti thung.
“Sorkar chuan he thil hi a ngai pawimawh hle a, hriatfiah fak kan tum dawn a ni” tiin Vasihnaw chuan a sawi a. “He ramah hian sawiseltu nasa tak awmin ni tin zing an thawh atanga issue hrang hranga sorkar sawisel ngar ngar an awm a. Chung mite chuan he ram hmasawnna hi an hmu thei lo,” tiin a sawi bawk.
Opposition MP rualte chuan Union government chu nasa takin an bei mek reng a. Moitra phei chuan Mosi sorkar chu sumdawng lian Gautam Adani nena inzawmna thuk tak neiah a chhuah a ni.
Rahul Gandhi-a’n Opposition leader tena Adani group an beihna nen thlunzawm
Congress leader Rahul Gandhi chuan Opposition leaders te phone hack tumna chu Adani group te an beihna nena inzawmna nei a ti a. “Prime Mnister Narendra Modi hi Adani nena inzawm tlat a ni,” tiin a sawi.
“A hma chuan Prime Minister Narendra Modi chu most powerful ah ka ngai a, Adani leh Amit Shah ten an dawtah ka ngai a. Tunah chuan Adani a powerful ber a, Modi leh Shah ten an dawt thung” tiin Rahul Gandhi chuan a sawi a.
“Hlauh kan nei dawn hauh lo va, kan auchhuak zel dawn” tiin Gandhi chuan a sawi bawk a. “Ka phone in duh a nih chuan la rawh u” tia sawiin, “Adani kan sawisel veleh CBI, ED te inralringin inenthlakna an tan mai,” tiin a sawi bawk.
Congress leader chuan, “Hlauh kan nei dawn lo va, kan aw kan chhuah zel dawn a ni. Ka phone hi in duh a nih chuan la ta che u,” tiin a sawi bawk.