State sum hmuh tura centre chet
muan vangin sum kan puk a ngai
– Home minister
Sawrkar laipuiin state ho hnena sum a semchhuah turah a chet muan avangin sum an puk rih lo thei loa, rulh erawh an rul lehnghal zel tih Home minister K Sapdanga chuan a sawi.
Thawhtannia ZPM office-a inkhawmah ZPM hruaitu K Sapdanga chuan sawrkarna an chelh hnuah sawrkar laipui inthlan a lo hun a, BJP kaihhruai sawrkar a din leh tak avangin tun thlengin state hrang hrang sum hmuh tur sem chhuah kawngah an che muang hle a, chu chuan keini state pawh a nghawng na hle a, loh theih loha sum puk a ngai a, amaherawh chu an puk hi an pe lehnghal zel tih a sawi.
Eptu party lam chuan an sum an rulh lehna sawi duh loin, an puk ringawt an tlangaupui duh zawng a lo ni a, sawrkar laipui chak tawk loh vangin beisei angin hma an la thei lo zawk tih a sawi a ni.
Foreign kuhva tawlh tibo turin theihtawp an chhuah a, sawrkar hmasa hunlaia zung a lo inkaih thuk tawh avangin an tum ang ngawta chawp leh chilha tihreh a lo har hle tih Home minister hian a sawi. “Tha kan thlah dawn loa, a hlawhtlinna kan la hmuh ngei kan beisei. Kuhva tawlh hian kan ram chhunga kuhva chingtute eizawnna a tichhia a, black money a tipung a, zirlaite hmakhua a tihchhiat bakah inhmun lo ram a ti to em em a. Chuvangin dan loa kuhva tawlh do kawngah sawrkar chuan tha a thlah dawn lo,” a ti.
Sawrkarna an chelh tirh atangin ram kawtchhuah check gate-a duty kutkem neite nuaibo hna theihtawpin an thawk nghal a. Checkgate zawng zawngah sawrkar phalna lo chuan sum lak leh khawn an phal tawh lo tih a sawi. VIP culture ti bo turin hma an la a, tunah chuan airport-ah pawh mipui nen ang khatin an zin veivak thei ta tih a sawi bawk.
Aikal tibo tura hma an lakna kawngah huaisen a ngai hle tih K Sapdanga hian sawiin, “Kan ram tan, tiin kan ring kan tikhawng lui a, tunah chuan sawrkar hnathawk aikal lak kan tibo thei ta. Office hunbi dik taka vawng turin hma lak a ni a, tunah chuan sawrkar hnathawkte pawhin office ah hnathawh hun tam zawk an nei thei ta,” a ti.
Halpuah leh halmawi leina atana sum tam tak luangral thin chu tha an ti loa, Diwali hmangtute pawhin halpuah leh halmawi hmang tawh lo turin an ngen mek tih Home minister hian a sawi. YMA nen tangrualin theihtawp an chhuah dawn tih sawiin, sawrkar hnathawk halpuah leh halmawi phur leh hal an awm a nih chuan sawrkarin na takin hremna a lekkawh dawn tih a sawi a ni.
State sum hmuh tura centre chet muan vangin sum kan puk a ngai – Home minister
