Social Welfare & Tribal Affairs, Women & Child Development department hnuaia State Tribal Resource & Training Centre (STRTC) buatsaihin Thawhlehni khan State Tribal Welfare & Development Policy chungchangah inrawnkhawm a ni.
SW&TA, W&CD minister chuan Lalrinpuii chuan ruahman lawk anga Mizoram bik tana Tribal Policy hmawr bawk fel a ni tur chu lawmawm a tih thu a sawi a. STRTC tana hmalaknaah hmasawnna a thlen ngei a beisei tih a sawi. Tribal-te hamthatna leh hmasawnna dap kawnga inhrilhhriat leh inrawnkhawm chu ram hmasawnna leh department hmalakna atan a tangkai dawn tih a sawi bawk.
SW&TA, W&CD commissioner & secretary Lalzarmawii chuan policy chhungah ruahmanna fing tak zeh a ni tih a sawi a. Tribal Affairs lama state hmalakna thuam chak turin UNDP-in staff pali an rawn pek tur thu leh tunkar chhungin interview buatsaiha lak fel mai tur an ni tih a sawi a ni.
STRTC-in State Tribal Policy a duan chhin leh mithiamten an lo chai tawh khaikhawmna chu STRTC director Dr Lalhriatzuali Ralte chuan powerpoint presentation hmangin a sawifiah a. India rama tribal-te hmasawnna kalpui a nih dan sawiin, sawrkar laipuiin India ram danpui hmangin policy leh guideline hrang hrang siam tawh mah se, mumal leh awmze nei zawka ‘Mizoram hmathlir 2047’ ruahman a tul avangin, state policy hranpa nei tura hma lak a ni tih a sawi. He policy leh sawrkar laipui hmalakna ‘Support to TRI’ tih scheme hnuaia hma lak a nih tawh dan leh STRTC thuam chak mek dan a sawi bawk.
Inrawnkhawmnaah hian sawrkar department hrang hrang hotute, civil society organization, tlawmngai pawl, Social Welfare department-a thawk tawhte, IAS Association (Mizoram) aiawhte, Mizorama hnam chi hrang hrang aiawh leh chanchinbumite an tel.
State Tribal Policy-ah inrawnkhawm
