State university dinna tur Bill pawm
Assembly Session neih mekah Thawhlehni khan state university hran neih tuma sawrkar hmalakna tur – The Mizoram State University Bill 2025 putluh chu sawiho a nih hnu ah pawm a ni.
Bill puluttu Higher & Technical Education minister Dr Vanlalthlana chuan state university chu an duh vang reng pawh ni loin National Education Policy hnuaiah din a ngaih zawk avang leh zirna sang zawk zir zawm duh, central university leh pivate university-a seat chang lo zirlaiten zirna sang zawk an belh ve theihna turin din a tul tih a sawi.
Sawrkar hmasa hunlai, 2023 August 16-ag state unversity din tur hian Bill Drafting Committee din a lo ni tawh a, hmun danga state university an kalpui dan an zirchian hnuah The Mizoram State University Bill chu 2024 December 22-a Council of Ministers thukhawm chuan Assembly Session hmasa bera pharh turin a lo pawm tawh tih H&TE minister hian a sawi. Ram pumah state university 481 a awm a, Mizoram leh Nagaland chu hmarchhak state zinga state university la nei ve lo awmchhun an ni, tiin, kum 2035-ah chuan Mizoram university chu research university a nih tawh dawn avangin, college nen a affiliate theih tawh dawn loh a, state sawrkar leh private college te lo kuahkhawma buaipui turin state university an mamawh dawn tih a sawi a ni.
He bill hian Mizoram State University chu state sawrkar resource neihsa hmang tangkai tura duangin, a hmingah Mizoram State Unversity tih a ni anga, a thuthmun chu Aizawl niin, a thuneihna huamchin chu Mizoram pum a ni dawn tih a sawi. Chancellor atan chief minister a ni anga, pro-chancellor ah Higher & Technical Education minister a ni dawn anga, state sawrkar hnuaia college-te chu university constituent college tih vek a ni dawn tih a sawi.
State university dinna tur Bill pawm
