US President Donald Trump-a chuan Middle East indo a chhuah tan tirh atanga Iran-in a tam zawk a khar, tui kawng pawimawh tak, Strait of Hormuz-a chil puah bomb kamte chu US Navy-in an la sawn a, tihpuak ngaite pawh an tipuak vek tawh tih a sawi.
“Iran hnenah hian chil puah bomb dah tura lawng emaw, lawngleng emaw kal reng reng chu rang tak leh awmze nei taka tihchhiat a ni ang tih hriattir a ni,” tiin Trump-a hian a Truth Social platform-ah a tar lang bawk.
President Trump-a thu sawi hi Iran chuan engtin mah a la chhang lo.
Strait khar hian khawvel pumah tuialhthei man a tisu nasa hle a. Trump-a hian US-in a thunun tih a sawi fo tawh thin a; mahse, Iran hian an phalna la hmasa lova kaltlang tum lawngte chu an kap zel tih an sawi ve bawk.
February 28 atanga US leh Israel tang dunin Iran an kaha indona a chhuah hma kha chuan strait-ah hian khawvela tuialhthei leh liquefied natural gas phurh 20% vel a kaltlang thin.
Strait a khar bakah hian Iran chuan Israel beiin a chhang let a, US-in a thawhpui an thenawma Arab leh Gulf-a tanhmun a neihte a bei bawk.
Indona tihtawp nan inkahhai puan ni zawk mah se a tawp zui lehnghal a, hemi hnuah hian US leh Iran hi an inkap tawn reng.
US hian Thawhtanni khan eibara Iran hrekna na tak tur a puang zui bawk.
US Treasury Secretary Scott Bessent-a chuan an hrekna kalpuiah hian Iran thawhpuitute pawh an en hran ve tur thu a sawi.
Strait of Hormuz hi Iran, United Arab Emirates (UAE) leh Oman inkara tui kawng zim tê a ni a. A zimna lai berah chuan km 33 chauhva zau niin Gulf atanga Gulf of Oman pawhna niin khawvela bungraw phurhna kawng pawimawh ber pakhat a ni.
Strait kaltlanga phur tuialhtheite hi Iran-a mi chauh a ni lo va, Gulf ram hrang hrang – Iraq, Kuwait, Qatar, Saudi Arabia leh UAE atanga phurh chhuahte pawh a tel.
Kum 2025 khan he tui kawng hi ni tin tuialhthei barrel maktaduai 20 chuangin a paltlang ziah niin US Energy Information Administration (EIA) chuan a sawi a, kum khat chhunga he kawnga sumdawnna kal ve hi $ tluklehdingawn 600 man a tling.
Kum 2022 khan strait kaltlanga tuialhthei thlitfim loh leh tuialhthei dang phurh zinga 82% vel hi Asian ram panpui an ni tih EIA chuan a tar lang a. China ringawrt pawhin Iran-in a thawn chhuah 90% vel a leisak nia chhut a ni.
Strait-a chil puah bomb then vek a ni tawh – Trump
