Djo ‘End of the Beginning’ chu Billboard Global 200 chart-ah No.5 atangin No.1-ah a invawrh a, Djo hi he chart-a a vawi khat No.1-na a ni. Hetirual hian The Police hla hlui ‘Every Breath You Take’ pawh a vawi khat nan chart top 10-ah a lang ve ta bawk.
Heng hla pahnih te hi Netflix series hit zet mai ‘Stranger Things’ soundtrack a an hman avanga rawn lar ve ve an ni a, Stranger Things hi a final season niin ngaihven pawh a hlawh hle a, he series-a soundtrack te pawhin ngaihven an hlawh phah ve leh ta zel a ni.
Djo (a hming tak Joe Keery) ‘End of the Beginning’ hi ama phuah leh produce a ni a, ‘Stanger Things’ soundtrack he chart-a No.1 kai thei pahnihna a ni ta. 2022 khan Kate Bush hla hlui, 1985-a a tlangzarh tawh ‘Running Up That Hill (A Deal With God)” chu he chart-ah hian a No.1 tawh bawk.
Tunkar chart-ah hian ‘80s classic dang Stranger Things avanga rawn lar thar dang a awm a, chu chu The Police ‘Every Breath You Take’ niin, No.9 a ni. He hla hi Stranger Things season two leh four-ah an hmanga, Rock and Roll Hall of Fame-ah pawh an lak luh tawh The Police hla he chart top 10-a lang thei hmasa ber a ni. 1984-a kehdarh tawh The Police hian ‘Every Breath You Take’ hi an larpui hle a, 1983 khan Billboard Hot 100 chart-ah kar riat chhung an lo No.1 tawh nghe nghe a ni.
Billboard Global 200 chart hi kar khat chhunga khawvel huapa hla lar dan tehna niin, chart ranking siam nan hian ram hrang hrang 200 chuanga official-only stream (subscription leh ad-supported audio leh video music services) leh download sales te chu tehna pawimawh a ni.
Djo ‘End of the Beginning’ hian kar khat chhungin stream maktaduai 80.7 leh sales 10,000 a nei thei a, hei hi chart-ah a No.1 pui ta a ni. ‘Every Breath You Take’ pawhin stream maktaduai 35.8 a nei thei bawk.
He chart-a kar li chhung No.1 ni thei Taylor Swift ‘The Fate of Ophelia’ chu No.1 atangin No.2-ah a tawlh a, kar 18 chhung No.1 ni thei HUNTRIX (EJAE, Audrey Nuna & REI AMI) “Golden” chu No.2 atangin No.3-ah a tawlh a, Olivia Dean “Man I Need” chu No.4-ah bawk awm lehin, kar 10 chhung No.1 ni thei Alex Warren “Ordinary” chu No.3 atangin No.5-ah a tawlh ve thung.
Billboard Global 200
Top10:
1 End Of Beginning – Djo
2 The Fate Of Ophelia – Taylor Swift
3 Golden – HUNTR/X: EJAE, Audrey Nuna & REI AMI
4 Man I Need – Olivia Dean
5 Ordinary – Alex Warren
6 Where Is My Husband! – RAYE
7 So Easy (To Fall In Love) – Olivia Dean
8 Back To Friends – sombr
9 Every Breath You Take – The Police
10 Opalite – Taylor Swift
Stranger Things finale-in Djo ‘End of the Beginning’ a vawrh lar
