Mizorama eirawngbawlna gas thawnluttu Indian Oil Corporation Limited chuan gas bur thar, subsidy awm ve lo, a duh tan mahni in lum atanga koh mai theih tho a nei thar a. Thawhlehni khan Food, Civil Supplies & Consumer Affairs minister B Lalchhanzova’n a khuhhawng.
Kg 16.3 a rit Indane Extralite Now FTC gas bur hi hman awlsam leh nuam zawk tura siam a ni a, gas cylinder pangngai aiin a zan zawk bakah a chhung langtlang theia siam a nih avangin, gas awm zat a hmuh theih a, refill hun tur pawh awlsam taka hriat theih a ni dawn. 10 kg composite cylinder (fiber glass) hmanga siam a ni a, tuiek (rust) ve thei lo tur leh kangmei chhuak thei lakah pawh him zawk tura beisei a ni.
FCS&CA minister chuan, eirawngbawlna gas indaihloh avanga dan lo (black) a gas lei thin chu hei hian a tihziawm a beisei tih sawiin, subsidy anga pek tur a nih loh avangin a man pawh a leitute mamawh ang zel (market based) a ni dawn tih a sawi. Mizoram-in IOCL atanga gas bur a hmuh zat a tlem phah dawn loa, mipuiin eirawngbawlna gas lama harsatna an tawh lohna turin sawrkarin hma a lak zel tih a sawi a ni.
Mualkhang Gas Bottling Plant hman theih tura hma lak mek zel a ni tih sawiin, ni khatah gas bur 8000 vel thun khah theiha ruahman a ni tih a sawi a. Mizoram chu a awmna hmun a pawimawh avangte, ruahtui tlak tamna a nih avanga inkalpawhnaa harsatna a awm thin avang leh, KMMTTP kal zel leh South Asia politics boruak inlumlet avang leh chhan dang dang vangin energy security neih a tul tih a sawi. Mizorama oil depot bun a nih theihnan hma an la mek tih a sawi bawk.
Indane Extralite hi tun dinhmunah MIZOFED leh Vanbuangi Gas Agency-in an pe chhuak phawt dawn tih sawi a ni.
Subsidy awm ve lo gas bur thar home delivery tih theihin siam
