Sudan-ah RSF-in thingtlang mi 200 chuang that
Tual chhung indona chhuak meka sipaite nena inbei, paramilitary Rapid Support Forces (RSF) chuan Sudan-a khua beiin ni thum chhungin civil mi ralthuam keng lo 200 chuang an that niin tual chhunga mihring dikna chanvo humhalhtuten an sawi.
Emergency Lawyers network chuan khaw beihna hi White Nile state hmara al-Kadaris leh al-Khelwat-ah niin sipai awm lohna hmun niin an sawi.
RSF fighter-te hi ‘mi tihhlum, ruk bo, tihluihnaa mi hruai leh mi thil neih chhuhsak’ an ching hle niin network chuan an sawi bawk.
Tun hma lama sipai nena thawk dun thin, April, 2023 atanga indo zui ta, RSF hian he thil thlengah hian engmah sawi an la nei lo.
Sipai chi hnihte hian sipai chakna hmangin thuneihna intawm an siam a; mahse, ram dangte puihna nena mipui sorkar din tura an chetna kawngah inmil lovin an inzui ta a ni.
RSF hruaitu thenkhat, Kenya-a awm mekte chuan an thunun chin hmunah anmahni puala sorkar siam an tum mek nia hriat a ni bawk.
Mi thiamte chuan RSF thil tum hi Sudan then darh lehzualtu a ni dawn niin an ngai.
Sudan-ah hian sipai leh paramilitary force inbeihna avang hian nunau an mangangin mihring mamawh a vâng hle a, mi maktaduai 12 chuangin an in leh lo an chhuahsan phah tawh.
Civil mi sang tam tak thah an ni tawh a, RSF leh sipai hian a titu-ah an inpuh tawn.
Sipai chi hnihte inbeihna hi Sudan-a sipai chakna hmanga ro rel lailawktu, army chief Gen Abdel Fattah al-Burhan leh a thachhangdawltu thin, a hmelma ni ta mek, RSF hruaitu ni bawk, Mohamed Hamdan ‘Hemedti’ Dagalo inkara inrem lohna vanga chhuak a ni.
RSF hi tun hnaiah che chhiain sipaiten an khawpui, Khartoum-a an ram chin tam tak an laksak a, an sipai hmunpui ngei pawh an chân.
Khawpui lovah pawh sipaite hian state pawimawh tak, Gezira pawh an thunun kim tep tawh.
An hnungtawlh nasat hle lai hian RSF hian an thawh leh nan tuna an la luah chian ram, Darfur leh Kordofan state thenkhatah sorkar din mai an tum ta a ni.
RSF hi an thawhpui pawl dangte nen Sudan-a anmahni pual sokar din tur chungchangah hian an thukhawm tawh nghe nghe.
Gen Burhan chuan RSF thil tih tum hi a duh lo hle a, Khartoum pawh a puma thunun ngei a tum.
RSF-in thla eng emaw zat liam taa Khartoum an beiha sipai hmunpui leh presidential palace an lak avangin Port Sudan-ah a inkhuar a ni.
Sudan-ah RSF-in thingtlang mi 200 chuang that
