Sudan kindergarten leh damdawi in beihnaah mi 114 thi – WHO

World Health Organization (WHO) hotu, Tedros Adhanom Ghebreyesus-a chuan Sudan-a kindergarten leh damdawi in beihnaah mi 114 an thih thu sawiin ‘ngaihtuahna fim nei miah lo’ chetna tiin a sawi.
Ningani kal taa South Kordofan region-a Kalogi khua beih nan hian drone hman niin UN chuan thi zinga 63 hi naupang niin an sawi.
Tual chhung indona kal meka lehlam zawk, Rapid Support Forces (RSF) tihah an hmelma, sipai leh damdawi pawl, Sudan Doctors’ Network chuan an puh.
Hetih lai hian RSF chuan an rama tuialhthei laih chhuahna lian ber, Heglig an la tih an puang.
Sudan-ah hian April, 2023 atang khan tang dun thin, RSF leh sipa inkara thuneihna inchuh avangin indona a chhuak mek.
An khawpui, Khartoum leh Darfur inkara North Kordofan, South Kordofan leh West Kordofan pathum awmna region hi tual chhung indona nasatna ber hmun pakhat a ni.
Mi maktaduai riat dawn awmna, Kordofan pathum lak hi sipaite tan RSF-in an thunun mek, Darfur chhuhsak tuma an beihnaa pawimawh a ni.
Sipaiten thuneihna an channa, Kalogi beihnaah hian mi 50 vel an thi nia sawi a ni a, an zinga 33 hi naupang an ni.
WHO hnuaia Attacks on Health Care monitoring system erawh chuan mi 114 thiin mi 35-in hliam an tuar niin an sawi thung.
Kalogo rorel khawl hotu, Essam al-Din al-Sayed chuan drone hmasa berin kindergarten a fuh a, a dawtin damdawi in fuhin a pathumnain naupangte chhanchhuah tuma bei mekte a fuh thung niin AFP news agency a hrilh.
A hma lam pawna civil mite kutthlak thina puh fo, RSF chuan engmah sawi an la nei lo va, hetih lai hian Tedros-a hian October thla khan Darfur-a el-Fasher damdawi in beihnaah civil mi tam tak an lo that tawh niin a sawi.
Tedros-a hian Thawhtanni khan Kalogi beihnaa dam chhuakte hi Abu Jebaiha Hospital, South Kordofan-ah enkawl tura lak an nih thu leh thisen pek an mamawh hle tih a sawi.
Beihna thleng a sawinaah hian Tedros-a chuan indo chu tihtawp a tul thu a tar lang a, “Sudanese-ten an tuar na tawh lutuk, inkahhai a tul,” tiin X-ah a tar lang.
RSF chuan chhim lam ramri hrula Heglig oil field an lak chu a pawimawh tak zet tih an sawi a. Sipaite chuan sipaiten a hmun him nan an inhnuhdawh thu Reuters news agency an hrilh.