Pung tam zawka sum dahna lem hmanga inbumna a hluar a, henga inhnamhnawihte hian khawpui aiin thingtlang lamah bum tur an zawng nasa tih Information & Public Relations minister Dr Vanlalthlana chuan a sawi.
Thawhlehnia Lawngtlai Press Club-a MJA Lawngtlai District annual conference a hmanpuinaah minister hian pung tam zawka sum dahna lem hmanga inbumna a hluar tih sawiin, khawpui lam aiin thingtlang lamah bum theih tur an zawng nasa a, rim taka an thawhchhuah pung tam zawk itna vanga sum dah punna lem hmanga bumna tawk an awm deuh reng a, mipui lam fimkhur a ngai tih a sawi. Chamchibumite chu hetiang inbumna laka fimkhur tura mipui hnenah zirtirna pe tam turin a chah a ni.
Lawngtlai District MJA president kalchhuak tur Lalngheta Ralte chuan Mizoram journalist-te kawng hrang hranga dawmkan an mamawh zia sawiin, sawrkarin ‘Hand Holding Policy’ a kalpui turah pawh journalist-te a huam tel ngei an beisei tih a sawi a. Awmze nei zawka chanchinbumite hmakhua ngaia sawrkarin ruahmanna a siam a tul tih a sawi a ni.
Annual conference rorelah thu pahnih an pass a. Mizoram sawrkarin advertisement rules a hmanlai chu ennawn se, I&PR department-in state sawrkar hnuaia department zawng zawngten an hman theih turin budget hranah Advertisemnt Fund dah turin thuneituten hma la se, tih leh, Mizoram chhimlam district-ah kawlphetha lakna chhe zing lutuk chuan mipui tawrhna a thlen nasat avangin sawrkarin a theih anga rangin chhimlamin kawlphetha mumal zawka hmuh theihna tura hma la se, tih te a ni.
Sum dahpunna lem a tam – I&PR minister
