15th Finance Commission-a Mizoram sum hmuh tur sawrkar hmasa in a tihfel har avangin state sum dinhmun a tha lawk thei dawn lo tih adviser to CM (Finance) TBC Lalvenchhunga chuan a sawi.
Thawhtannia ZPM office-a inkhawmah an party MLA TBC Lalvenchhunga chuan 15th Finance Commission-a state sum hmuh tur, kum 2021 khan lo tifel vek chu nise tun angin sum dinhmunah kan buai a rinawm loh tih a sawi a. Tunah chuan kan sum hmuhna tur kan la thlang leih leih chauh a, kum khat chiah hun awm tawhah chet lakna hun an nei hman mang dawn lo tih a sawi.
“Project pipeline-a awmte delay loh a awm mang loa, kan sum dinhmun hi a tha lawk thei dawn lo. Kumina kan sum puk theih chu vaibelchhe 900 a ni a, NABARD atang nen a vaia kan puk theih chu vbch. 1118 vel a ni. Chuta tanga leiba rulh tur kan neihsa chu vbch. 640 a ni a. Sawrkar inenkawlna tha lo avang khan cheng vbch. 100 kan hloh phah a, ka ta emaw tiin a rem rem an phawi hmasak tawp zel avangin vawiin hi kan thleng a ni,” a ti.
State leiba chu sawi loh, kum 2015- 2016 atanga K Deposit tlingkhawm ringawt pawh vaibelchhe 1300 a awm tih adviser to CM hian a sawi. June 2023 hnulama central atanga sum lo lut, nodal agency leh department-a lut tur pakhatmah dahluh a awm loa, ZPM sawrkar ni ah khan Ways & Means Advance cheng vbch. 139 ba sa, treasury ruakin bul an tan tih a sawi.
MNF-in SASCI sum vaibelchhe 226 an sawi chu nodal agency-ah dah a ni loa, khawiah nge an dah tih a zawt. “Bill pek a ngai a, puk chawp a ngaih phah. Kan puk hnu ah puk belh a la ngaih phah zel a, vawiin mai niloin nakumah pawh kan sum dinhmun hi hetiang zel a nih chuan that ngaihna a awm dawn lo. Bul tan nan inrenchem kan mamawh,” a ti.
MNF-in SASCI ti lapse-a ZPM sawrkar a puh a dik lo tih sawiin, SASCI kha thawk hman nise, ZPM sawrkar chuan March 31 hmain kumina project tur an thehlut hman vek a, sanction pawh an hmu hman tih a sawi.
“July-ah sanction a thleng a, sum an hmuh tawh ber chuan a hna kha semin tender mai se an zo hman ni mai tur. September 6-ah state sawrkar account-ah a lut vek tawh a, a thawktu tur thlang thei lo, a thawktu tur hnenah pechhuak thei bawk si lo, October 7-ah back date chawpin an siam a, work order pawh an hum vek. An hnate kha cheng nuai 5, nuai 7 leh nuai 10 te tein hna 1300 velah an sem darh a, an mi leh sa te tihlawm tum vang a ni,” TBC Lalvenchhunga hian a ti.
Duh nise nikum khan thla khat chhungin thawktu turte khan thawk zo hman vek tur an nih thu leh model code of conduct puan hmaa work order pek hman an nih avangin a phuar ve lo a. ZPM sawrkar hnu ah pe turin an rawn nawr leh si tih a sawi a ni.
Sum dinhmun a tha lawk dawn lo – Adviser to CM
![](https://theaizawlpost.org/wp-content/uploads/tap_logo-min-large.jpg)