Sum dinhmuna Mizoram sawrkar harsatna tih ziaawm thuai tuma theihtawp chhuah turin chief minister a ngen tih Congress Legislature Party leader Zodintluanga Ralte chuan a sawi.
CLP leader hian thuchah siamin, finance changtu chief minister-in state sum dinhmun that loh chhana Covid hrileng a chhuanlam mek laiin a duhsak zawng contractor leh minister-te state matching share pekna’n chuan sum a awm reng nia a lan thu a sawi a. Mizoram mipui nawlpui tana sum a harsat lai leh sawrkar hnathawkten hlawh an lak mumal theih loh laiin, tute emaw leh khawiah emaw atan chuan sum a tam si nia lang chu thil dik lo tak a nih thu leh ramin a tawrh mek thu a sawi.
Sawrkar hnathawkten a hun taka hlawh an lak theih lohna a rei tawh laiin, sawrkarin a hnathawkte hlawh tur a pekchhuah ringawt pawh ruling party worker-ten sawrkar fakna atan leh intihtheihna atana an hmang ta mek tiin, hei hian sawrkar dinhmun a hril chiang hlea a hriat thu a sawi. Mizoram sawrkarin IFMIS la ti fel lote tan hlawh a pek chhuah theih loh chhanah sawrkar laipui nawrna vang nia a sawi thin laiin, sawrkar laipui chuan state-te ti tura a tih chu harsatna an nei a nih chuan state-te a pawng nawr chiam ngai loa, an inchinfel hun a nghak thin tih a sawi a ni.
IFMIS kalpuina atan cheng vaibelchhe tam tak seng chunga sawrkar hnathawkte IFMIS-a an inthunluh zung zung theihna atana sawrkarin hma a lak loh dan atangin sawrkar hnathawkte hlawh tur a hlawma pek chhuah tur a neih meuh tawh loh vanga IFMIS chhuanlamah a ngai tih a sawi bawk.
Tunhnaiah state sum dinhmun chhiat vangin kar khat dawn Treasury khar ni chiah si lo, khar tlukin a awm thin tih Zodintluanga hian sawiin, sum harsat chhan nia sawrkar hotuten an chhuanlam, Covid-19 hrilen zualpui reh hnu kum hnih velah pawh sum harsatnain ziaawm lam pan chuang lo leh a harsa telh telh zawk nia ngaih chuan finance changtu chief minister-in sum a enkawl thiam loh bakah a duhsak zawngte a vur nasa tih a tihchian thu sawiin, ‘Chhuanlam zawngkual loa, sum dinhmun siamtha tura theihtawp chhuah turin chief minister hi ka ngen a ni,’ a ti.
Sum dinhmun siamthat tuma theihtawp chhuah turin CM ka ngen – CLP leader
