Sum dinhmun tha lo mah se hmasawnna kan hmu chho ta
– ZPM
Mizoram sawrkar sum dinhmun la tha lutuk lo mah se, sawrkar kum thara sum cheng vaibelchhe 900 luhpui a ni leh, Finance changtu chief minister hoa hma an laknaah hmasawnna kan hmu chho zel tih ZPM party chuan an sawi.
ZPM Gen. Hqrs. thuchhuak chuan, March 31-a sawrkar kum tawp khar ni ah chief minister, Finance minister ni bawk Pu Lalduhoma te nupa chuan Aizawl Treasury office pahnih – North leh South Treasury tlawhin hun an hmanpui tih sawiin, hetianga a department chan ngaihsaktu chief minister chu an chhuang hle a. Nikum sawrkar kum tawp ni pawh khan a lo hmanpui tawh tih a sawi.
Mizoram sum dinhmun tha lo tak pawhin kalphung thar sawrkarah hma a sawn chho hret hret tih sawiin, ‘Sawrkar kum thara cheng vaibelchhe 900 chuang an luhpui thei tur hian hma an sawn tih a lantir. Nikum khan cheng vbch. 500 vel sawrkar kum hlui atangin an chhuahpui a, sawrkar kum tharah nikum lama an luhpui aia vbch.400 a tam an luhpui thei hian, kan sum dinhmun tha lo viau mah se, Finance minister leh adviser to CM (Finance) Pu TBC Lalvenchhunga leh a thawhpuite zarah hmasawnna kan hmu a, a ngaihna hria Finance minister kan nei hi kan chhuang hle,’ a ti.
Kumin sawrkar kum a tawp rual khan pension charge lut sa zawng zawng pek fel vek hman a nih bakah GPF leh MR bill pawh a lut ang ang pek fel vek a ni tih ZPM hian sawiin, ‘Leiba rulh kawngah pawh sawrkarin tan a la nasa a. ZPM sawrkar tirh, December 2023 leh January 2025 inkar khan medical bill cheng vbch. 90 rulh a lo ni tawh a. K-Deposit a sum tang vbch. 653 pekchhuah a ni bawk. Hei bakah hian GPF cheng vbch. 782, ruang phurh man nuai 23 December 2023 leh January 2025 inkarah hian pek chhuah a ni,’ a ti bawk.
Sawrkar kum 2019- 2020 atanga 2023- 2024 chhunga kan eng chhit man (electric bill) sawrkarin a bat avang khan, cheng vbch. 22 chawi a nih laiin, ZPM sawrkar hnu 2024- 2025 a herchhuah chuan, bill pek that avangin cheng nuai 100 lawmman (rebate) dawn let a ni tawh zawk tih thuchhuah hian sawiin, sum enkawl thiam Finance minister tha neih leh neih lohin awmzia a neih zia a tichiang tih a sawi.
‘Finance minister leh a thawhpuite zarah kan sum dinhmunin hma sawn hret hret mah se, kan dinhmun hi a la tha lo hle tih mipuiin hrereng ila, theih ang anga sawrkar sum hman kawngah inrenchem a tul zia hre nawn fo turin mipui kan ngen a ni,’ a ti.
Sum dinhmun tha lo mah se hmasawnna kan hmu chho ta – ZPM
