Sum duh luat vangin halral thil hlanah Article 371G kan hmang – Lalruatkima

Sum duh luat vangin halral thil
hlanah Article 371G kan hmang
– Lalruatkima
Sum leh pai duh luat vangin ZPM sawrkar chuan halral thilhlan atan Article 371G an hmang tih MNF hruaitu Lalruatkima’n a sawi
Thawhtannia Mizo Hnam Run inkhawmah MNF treasurer Lalruatkima chuan ZPM chu an sawrkar tirh phat atangin an kutchhuak ni miah lo Lengpui Airport, ZMC Falkawn leh Serlui B Hydel Project hralh tumin an rel nghal a, tunah FCAA 2023 hmangin kan ram an hralh leh niin a sawi.
“Mizoram hian hmasawnna, infrastructure ropui tak tak kan awtin kan duh ngei a, kan ram, hnam leh sakhua a him dawn em, tih ngun taka ngaihtuah chungin, a that dawn loh emaw a him dawn loa kan hriat chuan hmanhmawh loa ngaihtuahna kan hman a tul a ni,” a ti
Kan inhungbikna Article 371G pawh sum leh pai, hausakna duh luat vangin ZPM sawrkarin halral thilhlan atan an hmang niin MNF hruaitu hian a sawi a. Zoram mipuiin Mizo nationalism chu development maichamah halral thilhlan atan kan hlan thiang loa, kum 2028-ah Zoram kalphung siamtha leh turin hnam rilru pu MNF a sawrkar leh ngei a tul tih a sawi a ni.
Mizo nationalism hi kan innghahna lungphum a nih chhung chu kan him dawn a. ZPM sawrkarah kan ram a thlaphang mek niin a sawi bawk. “Kan ram leh hnam a him theihnan leh Mizo nationalism vawngnung a, chhem alh reng turin mipui ka sawm a ni. Zoram hi kan thlahte chenna tlaka buatsaih leh venhim a tul a, hnam anga kan din chhuahna turin kawng kan sah zau a ngai. Kan pasaltha martarte thisen avangin Mizo hnam hi zahawmah kan awm a ni,” a ti.
CSS employee-ten chhungkaw pa ber hnenah pangchang taka mamawh thlenin an nuar a. Fate tap thlem tur sawrkar awm lo ang maiin, vauna leh thupek khauh pui pui an dawng a. Dan anga dahngheh ngiattute chu banah an vau let zawk tih Lalruatkima hian a sawi. “An chungchang ngaihtuaha cabinet thukhawm tur zawk awm tak, ZPM Coordination Committee an thukhawm daih a. Chief minister thusawi leh adviser to CM thusawi inkalh avangin ngaihdam dil hial a ngai kha sawrkar mumal loh zia tilangtu a ni,” a ti.