Inthlan result puan a nih a, sawrkarna siam thei an ni tih a chian hnu khan, chief minister tura hual sa Pu Lalduhoma chuan sum harsatna sutkian leh corruption titawp tura hmalak chu an ngaihpawimawh hmasak tur a nih thu a sawi a.
Sawrkar thar hian tun leh tunah chuan sum hi an hai lut nghal zut zutin a rinawm loh a; mahse, sum chhuak zut zut tur erawh an dang thei ve thung ang. Chumi atana pawimawh chu sum senna tul lo zawnchhuaha tihtawp phawt hi tun leh tun maia hmalak nghal theihna tur a nih a rinawm.
Election campaign laia an tih ve loh tur an sawi thin, lirthei kawl tih tlem leh lirtheia inzui duah duah … tih vel te pawh kha, tun leh tuna sum harsatna sutkian nana hma an lak nghal mai theihna tur chu niin a lang bawk.
Renewable energy hman uar atanga bul tan a, a hmahruaitu atan pawh sawrkar department office-te hi hman thiam a pawimawh khawp ang. Sawrkar department office zawng zawngin solar energy an hman vek theih chuan, sum luangral tur danna tha tak a nih a rinawm. Sum hmanralna hrang hrang enfiah a, kawng hrang hranga inrenchemna (austerity measure) kalpui hi sum harsatna sutkianna atana hma lak nghal mai theihna tur niin a lang. Chuti a nih loh a, Delhi lam atang chauha sum hi haichhuah tur emaw kan la ti zel a nih chuan, eng ruai kan ang leh chuangin a rinawm loh a ni.
Eiru lo tura intiam MLA 27 te hi, eirukna lo awm thin hmet mit tur chuan an chak tawkin a rinawm. Corruption hrim hrim hi chu khawvel a awm chhung chuan reh/tihtawp hmak theih a ni lo, mahse tihnep theih erawh a ni. Tuna sawrkar thar hian a ngaihpawimawh hmasak ber ni si hi, term khat chhung pawha an ne ne ralpui ve mai mai a nih chuan, a lehpek inthlan hmachhawn a huphurhawm leh maiin a rinawm. Sawrkar thar, hnuhma pawr la nei ve lo an nihna hi hlut se, chu chu kalphung thar bultanna tur a ni a, chumi hlenchhuah theihna chance tha tak an neih hi an hlenchhuah theih chuan, inthlan leh hunah pawh campaign hah vak a ngai hauh lovang.
Sum harsatna sutkian leh corruption…
