Chakma Autonomous District Council-a chief executive member hlui Kali Kumar Tongchangya chu hmasawnna hnathawhna tur sum a tihchingpen avangin court-in thiam loh a chantir.
Kum 2009 atanga 2013 chhunga Non Lapsable Central Pool of Resources (NLCPR) Fund hnuaia CADC-a hmasawnna hna thawhna tur sum chu tihchingpen nia hria in Mizoram District Council & Minority Affairs department chuan Anti Corruption Bureau-ah FIR a thehlut a. ACB hian a chhui a ni.
Heta chhuinaah chuan, Longpuighat leh Kukurduleya khaw inkar kawng siamna atan 1st instalment ah cheng nuai 382.98 dawngin, 2nd instalment nuai 382.99 dawng lehin, 3rd instalment atan nuai 363.88 an dawng a, an sum dawn hi a vaiin nuai 1129.85 a ni. Hetih hunlai hian Kali Kumar Tongchangya hi Chakma ADC-ah CEM a ni a, sum chingpen zawng zawng hi Rs. 179,03,773 a ni.
Sum chingpen hi hetihlaia ruling party office mamawh atan te, party mamawh atan bakah MDC inthlana ruling candidate 19 ho mamawh atante hman a ni hlawm a ni.
ACB hian case an chhui chhung hian sum chingpen zing ami Rs. 1,26,00,000 an man (seize) let a. Sum dawngtu MDC candidate 19 hi ACB hian an thuhretu atan an hmang zui bawk. Longpuighat leh Kukurduleya inkar kawngpui siam hi sum tih chingpen avang hian tun thlengin thawh zawh a la ni lo tih sawi a ni.
He thubuai hi Prevention of Corruption Act special judge Dr HTC Lalrinchhana chuan a ngaihtuah a. Thuhretu hrang hrang thusawi leh ACB thil mante buk a nih hnu ah court hian Kali Kumar Tongchangya, Kamalanagar-III, Lawngtlai district hi thiam loh a chantir (convict) a. Hlemhletna sum man chhuah Rs. 1,26,00,000 chu sawrkar sumbawma dah nghal turin a ti bawk. Thiam loh chantir tak hrem dan tur hi vawiin, September 26 hian court chuan a tichhuak dawn a ni.
Sum tichingpentu CADC CEM hlui thiamloh chang
