Sumdawng pawl, kohhran leh zirlaiten income tax chunchanga hriat tur pawimawh an zir.
Income Tax Department Shillong leh Department of Commerce Govt. Hrangbana College tangdun chuan zirlaiten income tax chungchang hriatna thuk zawk an neih theihnan Thawhtanni khan Aizawlah ‘Income Tax Awareness Programme’ an buatsaih a. Principal commissioner of Income Tax Imokaba Jamir, IRS chuan income tax chungchanga hriat tur a sawi a. commissioner of Income Tax Lalramsanga Sailo, IRS chuan Income Tax Act Section 10(26) hnuaia Mizoram leh hmarchhak state-a cheng tribal-te tana tax awlna (exemption) chungchang a zirtir.
Hemi hnu hian Income Tax Awareness Programme neih zui a ni a. Sumdawng pawl – Mizoram Business Coordination Committee, Mizoram Chemist & Druggist Association, Mizoram Merchant Association bakah kohhran aiawh leh mimal telin, income tax chungchanga rawtna leh harsatna an sawiho.
Income Tax Act 1961 Section 10 (26) tarlan danin, hmarchhak state – Mizoram, Meghalaya, Nagaland, Arunachal Pradesh, Tripura leh Assam hmun thenkhat leh Ladakh-a scheduled tribe ho chu income tax awl an ni a, amaherawhchu heng area pawn atanga eng kawng pawha sum lakluh nei chu tribal pawh ni mah se, income tax pe ngei turin danin a phut a ni.
Income tax return file tangkaina zirho a ni a. Bank loan lakna atan, TDS refund hmuhna atan, visa dilna atan bakah penalty leh income tax notice dawnna laka min vengtu a ni tih sawi a ni.
Income tax danah tu tan pawh nikhatah nuai hnih aia tam sumfai (cash) a dawn phal a ni loa, loan leh deposit Rs. 20000 aia tam cash-a lak leh rulh chu dan phal loh a ni. Bank transaction, UPI leh cheque hman uar leh cash hman tlem a tul tih sawi a ni. Income Tax department-in a bik taka information a lakkhawm zingah kum khat chhunga savings account-a cash deposit nuai 10 chin, current account-a nuai 50 lut, property lei leh hralhna nuai 30 chin, credit card hmanna nuai 10 chin, investment nuai 10 chin, foreign currency lei leh hralh nuai 10 chin report a dawng khawm thin a, a tul angin a sum lokalna source a endik thei a ni.
Income Tax hotute chuan, mipui mamawh chinfel sak turin Aizawlah help desk (ASK Centre) hawn a tul tih an sawi a. Income Tax 10(26) Exemption Committee chu CCIT North East Region hnuaiah din a ni tawh a, he Committee hian scheduled tribe-te tax chungchang zirtirna – frequently asked questions (FAQ) lehkhabu buatsaih tumin hma a la mek tih sawi a ni.
Sumdawng leh kohhranten income tax zir
