Lok Sabha member-a thlan thar Richard Vanlalhmangaiha chu hnamdang sumdawng lian leh mi thil titheite tlawn theiha awm lo turin chief minister Lalduhoma chuan a chah.
Thawhlehnia ZPM office-a an party MP candidate thlantlin a nih vanga lawmthu sawina inkhawmah chief minister chuan, “Mi nun tluang leh kum lamah pawh la naupang tak niin, kan ram tan hna tha taka a thawh theih ka beisei tlat a. Vai sumdawng lian leh thiltitheite tlawn theiha awm lo turin ka chah a, inthlahdah miah loa campaign chhunga a thawhnaah lawmthu ka sawi a ni,” a ti.
MP inthlan result chuan party tinte dinhmun a pholang chianga a hriat thu a sawi a. ZPM hmasawnna pawh hmuh theihin a lang, tiin, MLA bial 40-a bial 37-ah hnehna an chang a; MLA inthlana an tlin lohna bial 10-a hnehna an chang ta chu an lawm tih a sawi.
Model code of conduct hlih hunah sawrkarin chak lehzualin hma a la thei dawn tih chief minister hian sawiin, “Hnathawhna hun kan la neih tam loh avangin kan la siamtha duak duak thei bik loa, mah se, nitinin he ram siamtha tur hian hmalakna a kal reng a ni. Party thenkhat atanga sawiselna kan dawn hi kan haw loa, insiamthat nan hman zel kan tum. He ram tana rawngbawl tura hriak thihte kalsualna tur laka min vengtu an nih avangin an chungah lawmthu ka sawi a ni,” a ti.
Sumdawng lian leh thil titheite tlawn lo turin CM-in MP chah
